Pasabidearen helburua oinezkoek aipatu foru-errepidea galtzadatik gurutzatzea saihestea da, oinezko eta txirrindularientzat arriskutsua delako. Bide berriak 141 metroko luzera du, eta bere zabalera 4,50 metrokoa da. Horrela, oinezkoek eta txirrindulariek pasabidea erabili ahal izango dute. Gainera, pasabidearen norabidea ez da zuzena, bihurgunetsua da, erabiltzaileek bidea ikusteko erreztasunak izan ditzaten. Hurrengo asteetan argiteria eta biribilgunean zein errepidean segurtasun hesiak jarriko dituzte, azken horiek autoek zutabeen kontra kolperik izan ez dezaten.
Egitura, bai ohola, bai zutabeak, korrosioari eusten dioten altzairuz eginda daude. "Modu horretan, mantenimenduaren kostuak gutxituko dira, ez delako beharrezkoa behin eta berriz margoztea", azaldu dute Udaletik. Zutabeek eskultura forma dute, eta ibilbidearen arabera alde batera edo bestera tolesten dira. Oinezkoentzako pasabide hori aurreko udal gobernuek bultzatu zuten aurreko legegintzaldietan, tokiko agintariek nabarmendu duetenez. 2009ko abuztuaren 27an Sopelako Udalak proiektuaren erredakziorako lehiaketaren eskaintza egin zuen, eta urte bereko azaroaren 13an proiektua Estudio de Ingeniería Dynamis enpresari esleitu zion.
Gaur egungo udal gobernuak lanak Exvasa enpresari esleitu zizkion 2012an, 524.684 euroren truke (hasiera batean 600.000 eurotara heltzea aurreikusten zen), baina oraindik orain ez da behin-betiko likidazioa egin.
Azken hilabeteetan obretan egon ostean, astelehenean zabaldu zuten oinezkoentzako pasabide berria Sopelan, BI-634 eta BI-2122 foru errepideen eta Loroño kalearen artean. Horren bidez, Sopelako herrigunea hondartzekin eta Bareño bezalako etorkizuneko auzo berriekin lotuko da, udal iturriek nabarmendu dutenez. Hala ere, aurreko udal gobernuek (EAJrenak) egindako gestioa kritikatu dute EH Bildutik. Alde batetik, herrigunearen eta garapen bidean dauden auzoen eta hondartzen arteko pertsonen joan-etorriari konponbide bat ematea beharrezkoa zela uste du koalizio ezkertiarrak, BI-634 errepideak trafiko handia duelako eta herritarrentzat arriskutsua zelako errepide hori gurutzatzea, aipatu dutenez. "Haatik, hartutako erabakiak inguru horretan eragin bisual handia sortu du, eta Asu eta Bareño sektoreen urbanizatzearekin batera, inguru natural hori eraldatu eta desnaturalizatu egin da", diote. Sopelako Udal Gobernuaren arabera, "mota honetako proiektuak herritarren parte-hartzea bultzatuz gauzatu beharko liratezke, eta bestelako hirigintza mota bat bultzatu beharko litzateke, dentsitate baxuko etxebizitza-ereduak eta herrigunetik urrun dauden urbanizazioak sustatu barik". Argazkian, pasabide berria / © Sopelako Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun