Hogeita hamar bat zalek, Alex Mosterín nazioarte mailako muralgile eta skate zalea ere denaren gainbegiratupean, Mesedeetako Ama kaleko parkea pintatu dute auzoaren erdi-erdian sortzen den oasi baten antzera, diseinu deigarri eta oso koloretsu batez (horiak, orlegiak, marroiak...). “Bozketa bidez erabaki genuen bozetoa gauzatzea. Proposamena, skate parkearen barruan oasi bat sortzea zen, Areetak, oro har, iradokitzen duenetik abiatuta: Bizkaia Zubi Esekia, Txurrukaren estatua, hareatzak, palmondoak ... “, burutazioaren sustatzaileetako batek, "Kako" goitizenez ezaguna denak, azaldu duenez. “Guk geuk egiten dugu dohainik skate parkearen mantentze-lanak eta berriztatu beharra zuela ikusi genuen, pintura esku on bat emanda, erabileragatik eta pintadengatik apur bat hondatuta zegoelako”, esan du.
Skate zaleen irudiko, lan profesionala izan da. Lehenengoz, parkea konpondu zuten eta ondoren pintura berezi batekin margotu zuten, irudi berri batez jantzi eta, bide batez, itsustu egiten zuten pintada eta marrazki guztiak estaltzeko. Areetako Skate zaleen Elkarteak zerbait berezia egin nahi izan du, pista eraiki zuteneko 25 urte betetzen diren honetan. Ospakizun horrek, gainera, jarraipena izango du datorren maiatzean antolatu asmo duten jaiarekin.
Zabaldu zenetik 25 urte betetzen direnean, Areetako skate parkea berriztatu dute, auzoko skate zaleen elkarteak abiatutako ekimenari esker. Itxura berria eman diote, oasi bat irudikatuz. Getxo Kirolak udal erakunde autonomoak lagatako materialarekin eta udalerriko skate zale batzuk ere emandako laguntzarekin zaharberritu dute, agintari getxoztarrek adierazi dutenez. Lanak duela gutxi egin dituzte eta astebete iraun dute. Getxon bi dira dauden skate parkeak, hormigoizkoak, forma desberdina dutenak, kokatuta dauden lurzorura egokitzen diren ezaugarri propioak dituztenak eta kirol modalitate horretan jarduteko aproposak direnak: bata Areetako hau, guztiz hiritarra den ingurune batean lekutzen dena; eta bestea, Arrigunagakoa, hondartza ondoan dagoena. Azken hori iaz berriztatu zuten Algortako La Kantera Skate Eskolakoek, Areetako skate zaleek lagunduta. Argazkian, hainbat lagun Areetako skate parke berriztatuan / © Getxoko Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun