Getxoko Txorimalo gaztetxearen zortzigarren urteurrenaren ospakizunekin jarraituz, ostegun honetarako (apirilak 24), bertso-afaria antolatu dute bertoko neska-mutilek. Horrenbestez, entsalada mistoa, txanpiñoiez lagundutako oilaskoa eta limoi sorbetea dastatzeko aukera izango dute gerturatzen direnek, Hodei Barroso eta Imanol Uriaren bertsoekin gozatu aurretik. Txartelak Abian kultur elkartean eta Eztabaida Gune Antiautoritarioan salgai egongo dira, 6 eurotan, bihar bazkalordura arte. Bertso-afaria baino lehen, 17:30ean, agrolinpiadak egingo dituzte Txorimalon. Ostiralari dagokionez, "Desentxufatuak" antzezlana izango da eta Haizea bakarlaria igoko da gaztetxeko agertokira. Azkenik, larunbateko egun handira helduta, Joxe Replay, Ertz, Zartako K eta MJ Txokitron taldeek joko dute bertan; aurretik tortilla txapelketa eta herri bazkaria izango direla. Larunbateko egun osorako txartelak Abian tabernan zein Eztabaida gune antiautoritarioan egongo dira salgai, 8 eurotan, ostiral goizera arte. Argazkian, gaur jolasak izan dituzte txikienek Algortako Txiki-Otaegi plazako frontoian / © Txorimalo gaztetxea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun