Igande honetan, maiatzak 4, Sahararen aldeko VIII.Herri Krosa izango da Getxo udalerrian barrena, Tindouf-eko (Aljeria) kanpalekuetako errefuxiatuen alde. Atfal Getxoko Sahararen aldeko elkarteak eta Getxo Atletismo Klubak antolatuta, beste entitate batzuen artean, Udalaren laguntza du. Irteera eta helmuga Algortako Ereaga hondartzan izango da, tokiko iturriek adierazi dutenez. Horrenbestez, 15 urtetik gorako korrikalariak 11:10ean aterako dira eta 8 kilometroko ibilbidea egin beharko dute; Ereaga, Portu Zaharra, Ereaga berriro eta Bizkaiko Zubia inguruak igaroz, hareatza algortarrean amaitzeko. Haurrak (11 urtetik 14ra), ordea, 10:55ean aterako dira eta 1.500 metro egingo dituzte; eta txikiak (10 urte artekoak) 600 metro egingo dituzte, 10:45ean abiatuta. Argazkian, 2013ko otsailaren 24an egin zuten Sahararen aldeko krosa Ormaiztegin, baita elurpean egin ere / © Sahara-kros elkartea.
Izen-ematearen prezioa bost eurokoa izango da eta Algortako Kantxa Kirol Modan eta Bikilan egin daiteke; baita lasterketa hasi baino 20 minutu lehenago ere. Dirua saharar errefuxiatuen kanpamenduetako minusbaliotasuna duten pertsonentzako heziketa bereziko zentroetara zuzenduko da.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun