Etzi, maiatzak 1, Langileen Nazioarteko Eguna, Derion jarri du manifestazioa egiteko hitzordua Txorierri, Mungialdea eta Uribe Kosta hartzen dituen Eskumaldeko LAB sindikatuak. "Langileok erabaki, Euskal Herriak erabaki dezan!" pankartaren atzean abiatuko dira eguerdiko 12etan, Magefesa lantokiko aparkalekutik. Aurretik, bi kotxe-karabana abiatuko dira Deriorantz: bata, goizeko 10:00etan, Berangoko Eroskiko aparkalekutik, Uribe Kostako jendearentzat; eta bestea, 10:30ean, Mungiako Ferialetik, Mungialdea eta Txorierriko jendearentzat. Besteak beste, Algortako Ernaik bat egin du mobilizazioarekin; baita gazte antolakundeak larunbat honetarako Bilbon deitu duen nazio "manifestakziorako" gonbitea luzatu ere. "Gazteok prekarietatera, eredu heteropatriarkalera eta hezkuntza eredu merkantilizatu, elitista eta inposatura kondenatzen gaituen sistema larrutu eta bestelako eredu baten eraikuntzan sakontzeko batuko gara", adierazi zuten Ernairen ordezkariek orain egun batzuk, horren aurkezpenean. Orain 30 urte Euskaldunako langileen borroka "eredugarria" izan dela azpimarratzeko asmoz, 17:30ean abiatuko dira Deustuko Zubitik. Argazkian, 2012ko Maiatzaren Lehenean, 540 bat lagunek egin zuten bat LAB sindikatuak Astrabudua eta Altzaga arteko martxarekin, "Lotu borrokari" lelopekoa.
Bestalde, atzokoa, Lan Osasunaren eta Segurtasunaren Nazioarteko Eguna izanik, "behin-behinekotasunak aurten eraildako langileak hamabost" direla plazaratu zuen Algortako Ernaik. Herriko hainbat tokitan zeuden ikusgai "silueta zuriak" eta lan-istripuz hildako gizon-emakumeen izen-abizenak, adina eta herria irakur zitezkeen kartelak. "Egoera hobetu beharrean, aurrera eramandako erreformek langileon lan-baldintzak okertu eta eskubideak galtzera eraman gaituzte; lanaldiak handitzen ari direnean, soldatak murrizten, administrazio publikoaren laguntza inoiz baino beharragoa den honetan, osasuna pribatizatzen…", salatu dute gazteek.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun