Bilbaok Eusko Jaurlaritzaren lehen lehendakariaren bertuteak gogoratu ostean, Urkullu lehendakaria "Agirreren ondorengo zuzena" dela esan zuen. Hautagai bermeotarrak azpimarratu zuen Eusko Jaurlaritzako lehen lehendakariak europar eraikuntzan Schuman edo De Gasperi-rekin batera "europar talde berriak" izenekoaren barruan izan zuen egiteko garrantzitsua: "Agirre aitzindari bat izan zen, benetako europar federalista, batasun federalaren eta europar subiranotasunaren aldeko apustua egin zuena nazio-estatuen diskurtso zaharkituaren aurrean eta Europan bizi diren nortasun nazionalak hiritarren atxikimendu askearen bidez nazioz gaindiko egitura horretan egokitzeko beharraren aurrean".
Bilbaoren ustean, eraikuntza horrek akordioak behar ditu, "konbentzitu beharra dago, eta europar aniztasun guztia batu beharra dago Batasuna hau ondo eraikitzeko”. Zentzu horretan, faltan bota zuen Jose Antonio Agirre Lekuberen jardunaren ezaugarri izan zen dotorezia politikoa. "Berezko gaitasun eta abilezia zuen elkarrizketa eta akordiorako. Irain eta deskalifikazioaren etsaia izan zen, inguruabarrik txarrenetan ere. Egiteko modu horrek gidalerro izan behar du ardura politikoak ditugun guztiontzat. Polemika antzuak, aurkari politikoaren kontrako hitz zatarrak aspergarriak dira, ideia eta egitasmorik eza ezkutatzen dute, eta ez dituzte jendearen arazoak konpontzen. Horregatik uste dut Iñigo Urkullu dela gure lehen Lehendakariaren ondorengorik onena, berak ere gauzak egiteko modu hori berori praktikatzen baitu", esan zuen hautagai jeltzaleak.
Politikari bermeotarrak Agirre lehendakariaren pentsamoldearen eta jardunaren dimentsio soziala azpimarratu zuen: "enpresari eredugarria izan zen Chocolates Bilbainos lantegian garatu zuen lan sozialarekin, eta politikari eredugarria izan zen lehen Eusko Jaurlaritzako Lehendakari gisa. Ibilbide horrek bere aztarna utzi du abertzaletasun demokratikoaren baloreetan eta gure kudeaketa publikoan. Euskadin martxan jarri diren osasun, hezkuntza eta ongizate politikak ikustea besterik ez dago, gure lehen Lehendakariaren pentsamendu sozialaren garrantzia eta emaitzak ulertzeko".
Eusko Jaurlaritzako lehenengo lehendakari eta Getxoko alkate izan zen Jose Antonio Agirre Lekuberen Europazaletasun soziala aldarrikatu zuen atzo Izaskun Bilbao Barandikak. Eusko Alderdi Jeltzaleak Europako Legebiltzarrerako aurkeztutako hautagaiak parte hartu zuen atzo Algortako Agirre Lehendakariaren plazan egindako omenaldian eta bertan Agirreren “dotorezi eta praktikotasun politikoa” faltan botatzen zuela azpimarratu zuen, egungo politikariak “debate antzu eta aspergarritan tematuta daudela ematen duen garaian”. Bilbaoren ustez, eztabaida horiek “jendeari interesatzen ez zaizkien arren eta arazoak konpontzeko balio ez duten eta irain eta deskalifikazioan oinarritzen diren arren”. Hautagaiarekin batera, besteak beste, Itxaso Atutxa Bizkai Buru Batzarreko presidenteak eta Imanol Landa Getxoko alkateak parte hartu zuten Agirreri egindako lore eskaintzan. Ondoren, Getxo udalerriko hiru Uri Buru Batzarrek antolatuta, Agirre eta hildako alderdikideen alde Algortako Trinitarioen elizan egin zen mezara joan ziren hainbat jeltzale. Urdulizen ere, hildako alderdikideak izan zituzten gogoan, elizkizunak direla medio. Argazkian, atzoko ekitaldia / © EAJ.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun