Profila
Luis Rojas Marcos (Sevilla, 1943) New Yorkeko Unibertsitateko Psikiatrian katedraduna da, baita New Yorkeko Medikuntzako Akademiako, Osasun Publikoaren Amerikar Elkarteko eta Medikuntza Aringarriaren Amerikar Akademiako kidea ere. 1975an, Bilboko Unibertsitateko Medikuntzan eta Kirurgian doktorea izendatu zuten. Bere tesia, “La barrera del lenguaje”, Jose Guimon unibertsitateko katedradunak zuzendu zuen. Rojas Marcos irakaslearen eta EHUren arteko harremana jarraitu da New York eta Bilboko Psikiatria Sailen elkarlanaren bitartez.
Rojas Marcosek, Honoris Causa doktore izendatu berriak, elebitasunari buruzko ikerkuntza klinikoan eginiko lanaz argitaratu ditu hainbat artikulu Estatu Batuetako zientzia-aldizkari onenetan, hala nola, "Archives of General Psychiatry" eta "American Journal Psiquistry" aldizkarietan, eragin-indize handienekoak biak ala biak. Gainera, dibulgazio-lan handia egin du, egunkarietan artikuluak idatziz eta hainbat liburu argitaratuz, besteak beste, “La ciudad y sus desafíos”, “Las semillas de la violencia”, “Nuestra incierta vida normal” edo “Superar la adversidad: el poder de la resiliencia”.
Luis Rojas Marcos New Yorkeko Unibertsitateko Psikiatrian katedraduna Honoris Causa doktore izendatzeko ekitaldia egin zuen atzo Euskal Herriko Unibertsitateak. Zeremonia Zientzia eta Teknologia Fakultateko Paraninfoan egin zen, Iñaki Goirizelaia EHUko errektoreak eta Cristina Uriarte Eusko Jaurlaritzako Hezkuntza, Hizkuntza Politika eta Kultura sailburuak parte hartu zutela. Honoris Causa doktore titulu hori izendatzeko erabakia EHUko Gobernu Kontseiluak hartu zuen pasa den 2013ko abenduaren 19ko bileran. Luis Rojas Marcosen aitabitxia Jose Guimon katedraduna izan da. Medikuntza eta Odontologia Fakultatearen babespean, ekimena Neurozientziak Sailak bultzatu du, Rojas Marcosek erakutsitako "bikaintasuna ikasketen, ikerkuntzaren eta kudeaketa sanitarioaren arloan" oinarrituz. Errektoreak Honoris Causa doktore izendapenaren akta sinatu ondoren, Luis Rojas Marcosek, ohiturari jarraituz, zuhaitz bat landatu zuen, Honoris Causa doktoreen Pasealekuan, Leioa eta Erandioko campusean. Ondoren, ekitaldi nagusia egin zen eta, bertan, EHUko errektoreak titulua eta erramu birreta eman zion. Argazkian, ekitaldiaren une hori / © EHU.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun