Algortako Ernairen prentsa oharra
Getxoko UPyDren oharraren harira
Lehenik eta behin, Getxoko UPyD eta “kazetari” honen egozentrismo eta biktimismoa salatu nahi dugu. Maiatzaren 2ko goizean Algortan zehar agerturiko “txingote militarrak” Guardia Zibilaren agenteen irudi karikaturizatuak dira, haien presentzia itogarria salatzeko jarriak izan direnak; ez inor mehatxatzeko edota kikiltzeko. Hortaz, ez itzazue erasoak ez dauden tokian bilatu zuen burua biktimatzat joz; ez baitzarete munduaren erdigunea.
Bigarrenez, argi geratu da kazetari, edo hobeto esanda, sasikazetari honen profesionaltasun eza. Kazetari anonimo honek lan egiten duen komunikabidean albisteak honela egiaztatu eta ziurtatzen baldin baditu, agerian dago zer nolakoa den bere argitalpenen hartzaileek jasotzen duten desinformazioa eta manipulazioa.
Azkenik, eskerrak eman nahi dizkiogu UPyD eta sasikazetari honi, egin diguten publizitateagatik eta gure mezua zabaltzeko emandako aukeragatik.
Indar okupatzaileak alde hemendik!
Algortako Ernai
Pasa den astelehenean, "Kazetari getxoztar bati mehatxu egin diotela dio UPyDk" titularra zuen albistea argitaratu zuen UKBERRI.NETek. Bertan, aipatu alderdiaren prentsa ohar bat jasotzen zen, zeinean Getxoko tokiko komunikabide baten profesional batek "bortxa izugarria" jaso zuela aipatzen zen, "bere etxebizitzako fatxadan agur falangista egiten zuen txingote militar baten modukoa simulatzen zuen kartel erraldoia itsatsita ikusi behar izan duela". Getxoko UPyD-k ez zuen ez kazetariaren ezta komunikabidearen izenak zabaldu. Gauzak horrela, alderdi konstituzionalistari erantzuten dion beste komunikatu bat jaso du UKBERRI.NETek, Algortako Ernai gazte erakundeak igorrita. Ezker abertzaleko neska-mutilek alderdi konstituzionala eta "sasikazetaria" kritikatu dituzte, "erasoak ez dauden tokian bilatu" dituztelako, euren "buruak biktimatzat joz". Argitu dutenez, kazetariak ikusitako txingote militarrak "Guardia Zibilaren agenteen irudi karikaturizatuak dira, haien presentzia itogarria salatzeko jarriak izan direnak; ez inor mehatxatzeko edota kikiltzeko". UKBERRI.NETek jakin duenez, Getxoko Txorimalo gaztetxean gaur egingo den Alde Hemendik! Egunaren harira jarri dituzte irudi horiek. Argazkian, aipatu karikaturaren bat / © Algortako Ernai.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun