"Txosnak herri erdira!" kanpainaren oharra
Badira urte batzuk txosna gunea osatzen dugun eragileok kiroldegiaren parean dagoen parkinga uzteko asmoa genuela. Urteetan zehar udalaren erantzun ezezkorraren ondorioz leku aldatzerik ez da gauzatu, baina aurten aldaketa lortzera goaz!
Izan ere, aurtengo, 2014ko San Agustin jaietarako proposamen zehatza daukagu eta udala zein jai batzordearekin egin bezala, honen bitartez zuei ere proposamenaren berri eman nahi dizuegu.
Txosna gunea Martiartu kaleko aparkalekuan kokatzea da gure asmoa. (Metroaren atzekaldean, Santi alboan)
Badira urte asko jaiak eremu honetan egiten zirela, eta aurten jai gune zabal eta erakargarria egitearen aldeko apustua egiten dugu.
Erandio Altzagako “Erdi gunean” egoteko arrazoiak asko dira, eta leku aldaketa bideragarria izateareakin batera, Erandioko San Agustin jaientzako onuragarria izango delakoan gaude:
- Jai gunetik, taberna, metro, zein plazara erosoago mugitzeko aukera, dena hurbilago egongo baitzen
- Aldaketarekin, kiroldegiaren parean dagoen parkingean kotxerik ez litzateke kendu behar, beraz kotxe gutxiago izango ziren kaltetuak.
- Tartanga kaleak dituen gune ilun eta bakartiak ez lirateke arrisku izango.
- Kiroldegiko gunea handiegia izaten ohi da jaietan egoten den jende kopururako.
Gure proposamena zentzuzkoa eta bideragarria delakoan, jaso besarkada bat.
Gora Erandioko jai herrikoiak!
Ekimenaren kartela
Abuztuaren 28an izango da San Agustin, eta Erandioko zaindariaren egun horren inguruan ospatuko dira Altzagako jaiak, beste behin ere. Ohi bezala, aurten ere festa horietako osagai garrantzitsua izango dira txosnagunea eta bertan burutzen diren jarduerak. Herriko hainbat elkartek urteko jarduerak finantzatzeko erabiltzen dituzten behin behineko ostatuak, baina, herrigunetik Tartangara lekuz aldatu zituen Udalak orain urte batzuk. Bertako parking-a probatu ostean, Udalari hainbatetan eskatu diote herrigunera bueltatzeko, baina Udal Gobernuaren ezetza jaso dute orain arte. Jarrera hori aldatu nahian, "Txosnak herri erdira!" kanpaina abiatu berri dute eta baita toki alternatiboa proposatu ere. Txosnen ustean, gune aproposa litzateke Martiartu kaleko aparkalekua, metrotik 50 bat metrora dagoena, atzeko aldean. Haien aburuz, toki horren bidez, dimentsioak egokiagoak lirateke jaietan biltzen den jende kopururako, gune arriskutsuak ekidingo lirateke, gidari gutxiagori kalte egingo lioke eta irisgarritasuna hobetuko litzateke. Jai batzordeari eta Udal Gobernuari horren berri eman ostean hasi dira herritarrak informatzen. Oraingoz, Sortu eta Ernairen babesa jaso dute. Argazkian, koadrilak Erandioko jaietan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun