Keltse Eiguren Getxoko Udaleko Ingurumen Arloko zinegotziak tentuz mintzatu da ADEAC-FEE erakundeak hartutako erabakiaren inguruan: "Gorrondatxe-Azkorri hondartzari bandera urdina ez emateko arrazoiak ezagutu bitartean, oso pozik gaude beste urte batez lortutako bi sariengatik, horien bitartez gure hondartzen eta beren zerbitzuen kalitatea aitortzen dutelako, Udala, udalerri iraunkorrago bat lortu aldera, egiten ari den lana aintzat hartzearekin batera”.
Azkorriko hondartzak 1992an lortu zuen bandera urdina lehenengo aldiz eta horrez geroztik, 20. biderrez eskuratu du, salbuespen bakarrak Prestigeren isurketek sortutakoa eta aurtengoa izan direla. Ereagako hondartzan zazpigarren urtez izango da bandera urdina eta Arrigunagan bosgarrenez.
Ingurumen eta natura errespetatuz, itsasertzaren eta hondartzen gestioan egindako ahaleginagatik ematen zaie ikur hori Estatuko hondartza eta portu jasangarriei. Duela 27 urte hasi ziren ematen sariak. Bandera Urdinak aurretik ezarritako estandar batzuk bete izana egiaztatzen du, tartean, bainatzeko uraren kalitate ona, garbitasuna, informazioa, ingurumen hezkuntza, segurtasuna, zerbitzuak eta instalakuntzak. Bandera Urdinaren azken helburuak turismoaren garapen jasangarria eta hondartzarako eta gunerako ingurumen gestioa lortzea dira.
Algortako Ereaga eta Arrigunaga hondartzek bandera urdina jantziko dute, beste urte batez. Izan ere, Ingurumen-hezkuntza eta Kontsumitzaileen Elkarteak (ADEAC-FEE) gaur bertan jakitera eman duenez, 2014ko Bandera Urdina garaikurra eman die bi hondartzei, Getxoko Azkorri-Gorrondatxeri ez bezala. Gauzak horrela, Algortako hondartzak EAEn erreferentziazko hondartzak izango dira, urte berri batez, beren ingurumen kudeaketari dagokionez. Autonomia erkidegoko bakarrak izango dira, Azkorri-Gorrondatxe eta Earen eskaerak baztertu dituztela. Argazkian, aurten ez da bandera urdinik izango Azkorrin / © Getxoko Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun