Smokin' Joe Kubek eta Bnois King
Smokin' Joe Kubek (1956, Grove City; Pensilvania) Texaseko doinu elektrikoaren erakusle nagusienetariko bat da. Irvingen hezita, nerabezaroan Dallaseko kluben zirkuituan hasi zen jotzen eta bertan gitarrarekin trebezia handia erakutsi zuen. Laster abiatu zen profesional gisa eta Johnny Winter, Stevie Ray Vaughan eta Albert King musikari handiekin jardun zen, besteak beste.
1989. urtean Bnois King (1943, Delhi; Louisiana) ezagutu zuen jam session batean. Gitarra jotzen jazzaren eragin handia erakusten du Kingek gitarrarekin eta soul ahotsa dauka. Ordutik hona, bikoteak beren gitarren arteko oreka bikaina ardatz duen bluesa egiten du.
25 urteko ibilbide horretan mundu osoko areto eta jaialdietan aritu dira. Getxoko zaleentzat ez dira ezezagunak, 1999an, jaialdi bizkaitarrean jo zuten-eta, arrakasta handiarekin. Egun arte 15 disko grabatu dituzte. Horietako azkenak, "Road Dogs Life"k, abesti originalak zein The Rolling Stonesen eta The Beatlesen bi cover biltzen ditu. Aurreko diskoan lan akustiko arrakastatsua gauzatu ondoren, oraingo honetan doinu elektrikoak berreskuratu dituzte eta bere sustraietara itzuli dira, road house bluesera, hain zuzen ere, erritmo rockeroagoak eta indartsuagoak lortuta.
"Chicago Blues: A Living History" proiektua
Proiektua 2009. urtean abiatu zen aipatutako musikariek bultzatuta, XX. mendeko lehenengo zatian Chicagon sortu zen blues estilo berria omentzeko asmoz. Taldekide guztiak hiriko eszenan trebatu ziren eta hainbat hamarkadatan bluesaren arloan protagonista izan den eta popean eta rockean eragin handia izan duen estiloaren erakusle dira.
Billy Boy Arnold Jon Lee "Sonny Boy" Williamson eskutik abiatu zen bluesean eta Bo Didleyrekin arrakasta handia lortu zuen. Jarraian bakarrean hasi zen klasiko bilakatu diren abestiak grabatzen, esaterako "I Wish You Would", eta britainiar bluesean eragin handia izan zuen. Aipatzekoa da The Yardbirds eta David Bowie bezalako talde eta artista ezagunen jazarpena.
Gainerako taldekideek lotura berezia dute elkarren artean 70eko hamarkadatik aurrera. Garai horretan John Primer Muddy Waters handiaren bandari batu zitzaion Willie Dixonekin bira egiteko. Azken horrek Billy Branch gaztea kontratatu zuen Carey Bell ordezkatzeko eta Bellen semea ere, Lurrie Bell, Branchekin jotzera joan zen. Ondoren, bluesaren ahots handia izan zen Koko Taylorren taldean jotzen hasi ziren eta bertan Carlos Johnson elkartu zitzaien.
Beren ibilbideetan, taldeko musikari guztiek elkarlanean aritzeko aukera izan dute. Hori dela eta, elkar ulertze ezin hobea izan dute Chicagoko zenbait musikarien belaunaldietako lana erakusten duen proiektu honetan. "Chicago Blues: A Living History" (2009) debuteko lanak ospe handia izan zuen eta hori aurkezteko nazioarteko bira egin zuten Buddy Guy, James Cotton eta Magic Slim artista handiekin. Grammy sarietarako izendatu zuten diskoa eta hainbat sari eskuratu zituen nazioartean. Horren ondoren, 2011n, "The Revolution Continues" lan bikoitza kaleratu zuen taldeak, aurreko lanaren arrakasta handia berriro ere lortu zuela.
Getxon, "Chicago Blues: A Living History"k honako artista hauek osatutako bandak lagunduta egongo da: Billy Flynn gitarra-jotzailea, Matthew Skoller (harmonika), Johnny Iguana (teklatuak), Felton Crews (baxua) eta Kenny "Beedy-Eyes" Smith (bateria).
Smokin' Joe Kubek eta Bnois King abeslari eta gitarra-jotzaileak uztailaren 17tik 19ra izango den Getxoko Nazioarteko Blues Jaialdian jardungo dira, "Chicago Blues: A Living History" proiektuarekin batera. Kubek eta King egungo eszenako bikote interesgarrienetako bat bilakatu dira, bere musikan Texaseko doinu elektrikoenak eta jazzaren eta soularen eragin nabarmena duten beste erritmo batzuk uztartzen baitira. Saioa uztailaren 18an izango da, Algortako Biotz Alai plazan, 21:00etan. Hurrengo egunean, toki eta ordu berean, Chicago Blues estiloa izango da protagonista. "Chicago Blues: A Living History" proiektuan "haizearen hiri"-ko eszenako eragin handiko artistak bildu dira: Billy Boy Arnold eta Billy Branch harmonika-jotzaileak eta John Primer, Lurrie Bell eta Carlos Johnson gitarra-jotzaileak. Saio nagusi horretarako sarrerak salgai daude dagoeneko. Argazkian, Kubek eta King / © Getxoko Kultur Etxea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun