Uztailaren 30etik abuztuaren 2ra bitartean ospatuko dira aurten Algortako San Inazio jaiak. Hain zuzen ere, horien irudia izango dena aukeratzeko, kartel lehiaketa deituta du Algortako Jai Batzordeak, urtero legez. Proposamenak aurkezteko epemuga ekainaren 4a eta, beraz, bi aste besterik ez dira gelditzen lehiaketan parte hartu ahal izateko. Lanak aurkezteko parte hartzaileek Algortako Villamonte plazako A4 zenbakian dagoen Eztabaida gunera jo beharko dute. Egun horretan jai batzordeak osatutako epaimahaiak hiru aukeratu eta Internet bidez zabalduko ditu, jendeak gogokoena bozka dezan ekainaren 11ra arte. Edozein zalantza izanez gero, aixerrota.jaibatzordea[abildua]gmail.com e-posta helbidera jo daiteke. Saritu gabeko kartelak, berriz, egileei itzuliko zaizkie. Irabazleak 150 euro jasoko ditu. Argazkian, koadrilen jaitsiera artxiboko irudian.
Kartelen ezaugarriei dagokienez, 70x50 zentimetroko (ez-etzana) neurria eduki beharko dute aurkeztutako lanek, euskarri gogorrean edo paper gainean. Gaia librea bada ere, "Algortako San Inazioak 2014", "Uztailak 30-Abuztuak 2" eta "Jaietan ere euskaraz!" dira jarri beharreko leloak. Kartelaren atzealdean ezizen bat jarriko da, kartelarekin batera emango den gutun-azalaren kanpoaldean ere jarrita egongo dena. Gutun-azalaren barruan egilearen izen-abizenak, helbidea, telefonoa eta helbide elektronikoa, besteak beste. Baliabide informatikoak erabiltzekotan eta edozein kasutan ere CD bat aurkeztu beharko da kartelarekin batera, horren irudi digitalizatuarekin.
Kartel lehiaketaren oinarriak (pdf)
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun