Ekimena Getxoko Udalak bultzatzen duen zurrumurru arrazisten kontrako estrategiaren barruan kokatzen da eta baita azken hilabeteotan Julio Caro Baroja eta Aixerrota institutuetako ikasleak “Egin ekintza bat aniztasunaren eta inklusioaren alde” lelopean aurrera eramaten ari diren hausnarketa-jarduerak ere.
Kanpainak pertsona orori eskatzen dio bere eguneroko bizitzan ekintza bat egiteko aukera, aniztasuna eta integrazioa sustatze aldera. 12 eta 16 urte bitarteko gazteek UNESCOk sortutako “Aniztasunak: sormen jolasa”rekin ere lan egiten ari dira. Jolas hori pasa den otsailean aurkeztu zuten heziketa jardunaldi batean, Getxoko Berritzegunearen partaidetzaz.
Atzo, maiatzak 21, Elkarrizketarako eta Garapenerako Kultur Aniztasuneko Munduko Eguna ospatzen zela eta, "Arraza bat, herri mordo" erakusketa inauguratu zuten Algortako azokan eta bertan izango da ikusgai datorren ekainaren 19ra arte. Asier Reino argazkilariaren erakusketak “planetan dauden kultur desberdinen aniztasuna eta horien aberastasuna herritarrengana hurbiltzea" du xede, antolatzailea den Unesco Etxeak zabaldu duenez. Nekane Viota erakunde horren kideak gaineratu duenez, "aldi berean, kultur desberdinen inguruan batzuetan sortzen diren estereotipo negatiboei buruzko hausnarketa egitea ere sustatu nahi da, horrek elkarrizketa eta bizikidetza oztopatzen baititu”. Bere ustez, azokan paratutako argazkiak "dauden kultura ugariren erakusketa txikia da, munduko toki desberdinetako irudiak”. Argazkian, erakusketako kartela.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun