Joseba Arregi Hirigintza zinegotziak kontratuaren helburuak azaldu zituen, hala nola, "zerbitzuen kalitatea hobetzea, Europako zuzentarau berriak, Bizkaiko hondakinen gaineko osoko planeko kontzeptuak eta, bereziki, hiritarren eskaera eta jokaera berriak gehitu". Helburuen artean ere omen dago Getxo garbi edukitzea, modu jasangarri eta malguan, hiritarren parte-hartze eta inplikazioa areagotzea, aipatu zerbitzuak orientatzeko komunikazio-plan baten bidez, eta Ingurumen Foroaren barruan lantaldea sortzea, hori guztiaren jarraipena egin dezan. Halaber, edukiontziak edozeinek erabiltzea eta, oro har, inpaktuak, esate baterako, zarata, txikiagotzea lortu nahi da.
Helburuak
Udal arduradunek adierazi dutenez, kontratuaren helburuetako bat da, horrek irauten duen bitartean, zortzi urtean, hondakinen %50 modu selektiboan biltzea eta bereiztea. Eta kontratuak honako "berrikuntza" hauek jasotzen ditu: bosgarren edukiontzia edo kontainer marroia ipintzea, zabor organikoa modu selektiboan batzeko (pertsonalizatutako baimen edo atariko bilketaren bidez egingo da bilketa); urtebetean edukiontzi-flota berritzea; eta 6 eta 9 arteko gune berriak ezartzea lurperatutako edukiontziekin, etxeko olioa batzeko kontainerra, saltokietan kartoia eta bilgarrien zuzeneko bilketa, eta merkatu, fruta-denda eta arrandegietako hondakinen sorburuko bilketa.
Horrez gainera, kontratu berrian ere aurreikusten da igande eta jaiegunetan eta arratsaldetan oinezkoentzako guneetan garbiketa zerbitzuak indartzea; parke publikoetako egoteko zonak gehiago eta hobeto garbitzea; paperontziak aldatzea; eta Gobelako ibilgu eta ezpondak urtean hiru aldiz (gaur egun bi) garbitzea eta Bolue eta Kandelu urtean birritan.
Udalaren ingurumen-guneari dagokionez, garbigune bat ipintzeko aukera aztertuko dute; inpaktuak murrizteko neurriak ere hartuko dira, besteak beste.
Getxoko Udalbatzak bideak garbitzeko, hondakin solidoak jasotzeko eta garraiatzeko, eta Udalaren ingurumen-gunea berritzeko eta ustiatzeko kontratua esleitu zuen atzoko osoko bilkuran, 10 milioitik gorako urteko zenbatekoarekin. Gaur egungo kostua baino %15 gutxiago, tokiko agintariek nabarmendu dutenez. Cespa eta Asaser enpresek osatutako aldi baterako elkarteari esleitu diote, zortzi urtez; urtebeteko iraupeneko ondoz ondoko lau alditan luzatu ahal izango delarik. Akordioa aurrera atera zen EAJren eta PSE-EEren aldeko botoekin. PPk aurka bozkatu zuen eta EH Bildu abstenitu egin zen. PPk ezetz esan zion kontratuari, bere iritzian, “gure herriko beharrak ez dituelako asetzen. Joandako mendetik datorkiguna errepikatzen duen kontratua da, bide publikoan edukiontziak utzita, beste 12 urterako zigortzen gaituen sistema zaharkitua delako”. EH Bildu, bere aldetik, zerbitzuen azpikontratazioaren aurka agertu zen berriz ere eta atez ateko zabor bilketaren alde, eta adierazi zuen gertutik zainduko duela “bere taldeak egin eta kontratuaren baldintzetan jaso diren iradokizunak betetzen direla”. Azkenik, PSE-EEk proposamena babestu zuen, kontratuan bere zenbait ekarpen sartu direlako, hala nola, erraz erabiltzeko olioaren eta plastikoen edukiontziak. Argazkian, hainbat edukiontzi Algortan / cc-by Getxoko EH Bildu.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun