Keltse Eiguren Berdintasuneko zinegotziak giza eskubideen urraketa berri hori gaitzetsi eta, ondoren, tratu txar fisiko edo psikiko jasaten dituzten emakumeei gogoratu die Gizarte Zerbitzuetara (944 660 151) joan daitezkeela, han egoeratik ateratzeko laguntza emango baitiete. Halaber, Eigurenek gogoratu du Udaltzaingora (944 660 202) edo Ertzaintzara (944 063 420) ere joan daitezkeela, baita Eusko Jaurlaritzaren tratu txarren biktimen telefono zenbakira (900 840 111) eta SOS Deiak-era (112) jo ere.
Getxoko Udaltzaingoak 51 urteko gizon bat atxilotu zuen atzo (maiatzak 29) goizaldean, genero indarkeria delitu bat egotzita. Atxiloketa 02:40 aldera izan zen. Udal iturriek zabaldu dutenez, ustezko erasotzailea bera agertu zen Getxoko Udaltzaingoaren egoitzan: bere emaztearekin eztabaida izan zuela eta bultzada eta irain batzuk izan zirela esan zuen. Polizia biktimarekin jarri zen harremanetan eta berak adierazi zien bere senarrak eraso egin zuela eta, horren ondorioz, osasun etxera joan behar izan zuela, jasandako zauriak sendatzeko. Ikerketako dilijentziak Gau eta Eguneko Auzitegira bidaliko dituzte epaitegi arinaren prozeduraren bitartez. Argazkian, Algortako Bilgune Feministak deituta 75 bat pertsonak Andina Pereira de Brito Mungiako bizilagunaren erailketa salatu zuten martxoaren 19an Algortan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun