Aipatu bezala, probak bi fase dauzka: orokorra eta espezifikoa. Fase orokorrak batxilergoa amaitzean ikasleek graduko unibertsitate-ikasketa ofizialak egiteko izan beharreko heldutasuna eta oinarrizko trebetasunak dituzten ala ez neurtzea du helburu. Honako bost azterketez osatuta dago (aurreko sisteman baino bi gutxiago): Gaztelania eta Literatura; Euskara eta Literatura; Filosofiaren Historia edo Historia; Atzerriko Hizkuntza eta Batxilergoko gai komunetako baten azterketa, ikasleak nahi duena Gai bakoitzak 0 eta 10 bitarteko nota jasoko du, eta fase honetan gehienez 10 atera daiteke.
Fase espezifikoan ikasle bakoitzak Batxilergoko bigarren mailako modalitateko edozein gai aukera dezake, fase orokorrerako aukeratu duena izan ezik. Gehienez hiru gairen azterketak egin ahal izango ditu fase espezifiko honetan. Gai bakoitzari 0 puntutik 10 puntura bitartean emango zaio. Nota kontuan hartzeko, ikasleak 5 puntu edo gehiago lortu beharko ditu eta azkeneko nota aterako da borondatezko bi nota onenak eta haztatzeko parametroak biderkatuz. Haztatzeko parametroen baloreak 0,1 eta 0,2 dira eta unibertsitateak ezartzen ditu gaiak hautatutako graduarekin duen harremanaren arabera. "Fase espezifikoa borondatezkoa da eta haren helburua da neurtzea ikaslearen ezagutzak eta arrazonatzeko gaitasuna arlo jakin batzuetan, alegia, unibertsitatean egin nahi dituen ikasketekin zerikusia duten arloetan. Fase honek aukera ematen dio ikasleari fase orokorrean lortutako kalifikazioa hobetzeko", EHUtik azaldu dutenez.
Orduak
Unibertsitatera sartzeko probak etzi 8:45ean hasiko dira eta 18:45ean bukatu. Bigarren egunean, ostegunean, azterketak 9:00etatik 18:45era arte izango dira eta hirugarren egunean, ostiralean, 9:00etatik 15:00etara.
Araba, Bizkaia eta Gipuzkoako 9.294 ikaslek asteazken honetan, ekainak 4, hasiko dituzte unibertsitatera sartzeko azterketak EHUn, iaz baino %5,4 gehiagok. Guzti horietatik 6.252k egingo dute hautaproba euskaraz, bi herenek. Selektibitatea EHUn egingo dutenei, Goi Mailako Heziketa Ziklo bat (Lanbide Heziketa) egin duten eta fase espezifikora bakarrik aurkeztuko diren beste 500 neska-mutil gehitu behar zaizkie, baita selektibitate azterketa aurreko urteetan egin eta kalifikazioa hobetzeko aurkezten diren beste 800 inguru ere. Horrenbestez, azterketak hiru egunetan zehar egingo dituzte, ostiralera arte. Probari dagokionez, Batxilergoko notaren eta fase orokorreko kalifikazioaren artean egindako batez besteko nota haztatuan (%60 Batxilergoari dagokio eta %40 fase orokorrari) 5 puntu edo gehiago lortuz gero proba gainditutzat joko da, baldin eta ikasleak fase orokorrean gutxienez 4 puntu lortu baditu. Nota horri gehituko zaio fase espezifikoan lortutakoa. Argazkia: © EHU.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun