Sopelako umeek jaietarako iradoki zituzten ideien artean, bat buruhandiena izan zen. Horregatik, nork bere buruhandia egiteko tailerra antolatu du Jai Batzordeak, gero jaietan kalejiran ateratzeko asmoz. Beraz, umeak eta nagusiak gonbidatuta daude tailerrean zein kalejiran parte hartzera.
Buruhandiak egiteko kartoia, kartoi mehea, goma-aparra, birziklatzeko materialak… erabiliko dituzte. "Etxean ditugun gauzen artean erabil ditzakegunak ere ekarri: kartoizko kutxak, oihalak, artilea, arrautzetarako ontziak, yogurt poteak, oparietarako paperak, birziklatzeko materialak, tapoiak, ilea egiteko gauzak… Hau da, buruhandia eraikitzeko bururatzen zaizuen edozer. Zuek etxetik ekarritako material berrerabilgarriekin eraikiko ditugu Sopelako buruhandiak!", azaldu dute Jai Batzordetik.
Horrez gain, komenigarria litzateke parte-hartzaile bakoitzak bere buruhandiak zer pertsonaia izatea nahi duen pentsatuta eramatea. "Kamiseta zaharra ekar dezakezue, arropa ez zikintzeko", gaineratu dutenez.
Jarduera herrikoiak
Sopela eta Larrabasterrako jaietan jarduera herrikoiak izango dituzte egunero sopeloztarrek: koadrila jaitsiera, herri-bazkariak, lehiaketa herrikoiak (bakailaoa, pintxoak, marmitakoa...), batukada parte-hartzailea, karaokea, kanpaldi familiarra, kirol txapelketak... gustu eta adin guztietarako. Jaitsieran eta jolasetan parte hartu gura dutenek helbide honetan eman dezakete izena: sopelakojaibatzordea[abildua]gmail.com. Halaber, Sanpedroetako bazkarirako txartelak ere turismo bulegoetan eta Laiak tabernan erosteko aukera egongo da.
Aurten ere osagai nagusi bat izango dute gure Sopelako jaiek: parte-hartzea. Azken urte bietan bezala, badira hilabete batzuk Jai Batzordean herriko hainbat eragile, talde eta sopeloztar batzen hasi zirela Sopela eta Larrabasterrako jaiak prestatzeko. Helburua denen artean "jai herrikoi, parte-hartzaileak, parekideak eta euskaldunak" egitea izan da. "Herritik eta herriarentzat" lan egiten ahalegindu dira. Eta, aipatu dutenez, horren isla izango da jaietako egitaraua. "Sopeloztarrak, ikusle hutsak izateari utzi eta jaietako aktibo nagusiak bihurtuko dira hirugarren urtez", adierazi dutenez. Baina jaiak hasi baino lehenago, hiru hitzordu jarri dituzte. Batetik, ostiralean, ekainak 5, buruhandi-tailerra egingo dute Kurtzio kultur etxean, 17:00etatik aurrera. Bestalde, larunbatean (hilak 7), 13:00etan, udaletxeko plazan, sopeloztar guztien artean jaiak iragartzeko bideo bat grabatuko dute. Deialdia guztiz irekia da. Azkenik, ekainaren 14an, 13:00etan, Kurtzion, aurtengo programaren nondik norakoak azaldu eta kartelaren irabazlea nor den iragarriko dituzte. Argazkian, Sopelako San Pedro jaien hasiera, artxiboko irudian / © Sopelako Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun