Kultur ekimenak, jana eta edana eskuragai jarriz, proiektu pedagogiko batentzako dirua batuko dute larunbatean Sopelan, Ibilaldia moduko ekimen xume baten bidez. Oraingo honetan, baina, ez da 1990ean edo 2004an bezala Ander Deuna ikastolaren alde izango, Tanzaniako Iparrean dagoen Moshi hiritik gertuko Newlands herriko eskola publikoa zabalik mantentzeko, dituen 35 umeen ikasketak ordaintzeko eta kalean oraindik diren 200 haurrentzako eskola berria eraikitzeko baizik. Jaialdi solidarioa Born To Learn (Ikasteko jaioak) gobernuz kanpoko erakundeak antolatu du eta arratsaldeko 4etatik goizaldeko 1 arte, bere egitarau zabala hartuko du Sopelako udaletxe plazak: umeentzako txalaparta tailerra, BTL proiektuaren aurkezpena, ipuin kontalaria, aurpegi margotzeak, globoflexia, batukada, suzko malabareak perkusioarekin, bingo solidarioa, kontzertuak, txosna, bokatak, azokatxoa eta abar. Born To Learn elkartea 2011n sortu zen, Tanzaniako Moshi hirian. Euren helburua bertan eskola publikora joateko baliabide ekonomikoak lortzea da, bertako haurrek hezkuntzarako aukera izan dezaten. Teorian doakoa da hezkuntza Tanzanian, baina praktikan familiek 25 eta 30 euro bitarteko kopuruak ordaindu behar dituzte urteko Lehen Mailako ikasle bakoitzeko. Jende gehienak ez dauka bertan dirutza den diru hori. Argazkian, eskolako ikasle eta langileak otorduan / © Born To Learn.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
