Halere, Deustun musikari gehiago arituko da. Ekainaren 12an, zikloak saio bikoitza eskainiko du. Alde batetik, ekimena Deustuko Udaltegira (Agirre Lehendakaria etorbidea, 42) aldatuko da, horko eszenatokia egokiagoa baita kontzertu intimista bat egiteko. Bertan, gitarraren akonpainamendu soilaz, Josu Bergarak merkaturatuta dauzkan "Karramarroen Hiria" eta "Nora zoaz" diskoetan bildutako doinuak eskainiko ditu. Bestalde, Salestarren elizan, Bilboko musika koralean erreferentziatzat jotzen diren San Inazio abesbatza eta Deustoarrak abesbatzaren arteko emanaldi bateratua egingo da. Gorka Beriain eta Roberto Bienzobasen zuzendaritzapean, bi talde horiek generoaren zaleak gozaraziko dituzte.
Hurrengo ostegunean, jazz musikaren txanda izango da Euskaljazz Konnection taldearen eskutik. Seikote horrek euskal musika herrikoia ozeanoaz bestaldeko musika-tradizioetako oihartzunekin uztartzen du, Ainara Ortegaren (Musikenen jazz-kantaritzat lizentziatu den lehendabiziko emakumea) ahotsari esker. Emanaldia La Haceria aretoan izango da.
Azkenik, Borja Estankonak zikloa itxiko du Euskararen Etxean, San Inazion (Agoitz plaza, 1), hilaren 26an. Arratiako kantautoreak bi disko plazaratuak ditu dagoeneko ("Estankona" eta "Fruitua"), eta batean zein bestean, agerian utzi du popa, rock aurrerakoia, countrya eta bals-a bezalako musika-estilo desberdinekiko zaletasuna.
Algortako Gibelurdinek laukoteak Deustuko Ramon y Cajal kalean joko dute bihar, osteguna, 19:30etik aurrera, jai-giroko kaleko doako kontzertuan. Izan ere, Fredi Paya, Ekaitz Larrazabal "Katxo", Josu Aurrekoetxea eta Ekain Iurrebasok abiatuko dute Bilboko Udaleko Kultura eta Hezkuntza Sailak Deustuko errepublikan ekaineko ostegunak euskal musikaz alaitzeko sortutako zikloa. Folk musika lantzen duen taldeak leku desberdinetatik ekarritako musika-tresnen laguntzaz arituko da, mundu osoko musika herrikoietan inspiratutako doinuen bitartez. Izan ere, Europako lau muturretako herri-musika jotzen dute, Balkanetatik Finlandiara eta Okzitaniatik Irlandara, euskal musika herrikoiaren koloretik ulertuta. Mundu osoko dantzalekuetan musika berbera entzuten denean Gibelurdinek laukoteak "gure nortasunaren eta aniztasun kulturalaren defentsan herri-musika aldarrikatzen" du. Argazkian, Gibelurdinek Algortako Indabada Mundialean, Jon Ander pandero joleak lagunduta.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun