"Iraingarria da gure bizitza arriskuan jartzen duen politika baten alde egitea", adierazi dute preso politikoen sebideek. Etxerat-eko kideek dei egin diote gizarteari sakabanaketa politikaren amaierarekin engaiatu dadin, neurri "krudela" delako eta "mendekuan" oinarrituta dagoelako.
Egun, Euskal Preso Politikoen Kolektiboko (EPPK) ia 500 kideen artean, Uribe Kostako 25 bizilagun dago. Horietatik bost Frantziako espetxeetan dira eta gainontzekoak Espainiakoetan. Iñigo Otazua Urresti "Oti" algortarra eta Urtzi Paul Larrea getxoztarra izan ziren kartzela atzean uzten azkenak; hurrenez hurren, martxoaren 17an eta apirilaren 14an. Hain zuzen ere, larunbat honetan, ekainak 7, Dispertsioaren Aurkako Eguna egingo dute Algortan. Horrenbestez, 13:00etan, ekitaldia izango da Katea inguruan (Bidebitarte kalean, Bodeguilla eta Salsidu tabernen artean). Eta horren ostean, poteoa eta musika. Bazkaria ere izango da, 15:00etatik aurrera. Horretarako txartelak (12 euro) salgai daude jada Algortako Abian, Hator eta Itzubaltzetako Branka tabernetan. Umeentzako menua ere badago, 5 eurotan.
Eskupilota Sopelan
Sopelan, berriz, Etxerat elkarteak antolatutako eskupilota txapelketako partidak jokatuko dituzte egun berean, udal pilotalekuan. Txapelketa herrikoia da. Hartara, Uribe Kosta eskualde osoko pilotazale guztiak bertan parte hartzera animatu ditu euskal preso eta iheslari politikoen eskubideen aldeko tokiko herri bilguneak. Jaialditxoa 18:00etan hasiko da eta izen ematen duten bikoteen arteko partida laburrak burutzea da helburua, Elorrioko finalerako bikote bat sailkatuko dela. Izen-emateak 15 euro balio du, bikoteko kamiseta bat opari. Ondoko helbidera izena eta neurria ematea besterik ez dago: pilotakadazuk[abildua]gmail.com.
Espainiako Gobernuak duela 25 urtetik darabilen euskal presoen sakabanaketa politikak "oinarrizko eskubideen zapalketa iraunkorra" eragin, eta legedian edo nazioarteko gomendio eta printzipioetan "inolako babesik edo euskarririk" ez duela adierazi du gaurko osoko bilkuran Eusko Legebiltzarrak. EH Bildu eta EAJren 48 ordezkariek babestu dute koalizio soberanistak aurkeztutako legez besteko proposamena, Madrili sakabanaketa politika bertan behera utz dezala eskatuz, "horretarako lege-oztoporik ez duelako, euskal presoek beraiek, euren senideek eta euskal gizartearen gehiengoak adierazitako borondatea delako, gizalegezkoa delako eta bake eta elkarbizitza sendotzeko lagungarria delako". Eztabaida amaitzean, agerraldia egin dute Etxerat elkarteko ordezkariek Legebiltzarreko prentsa aretoan eta "oso larritzat" jo dute PSE, PP eta UPDren jarrera; hiru horiek aurka bozkatu baitute. Argazkian, martxoaren 10ean, euskal presoek pairatzen duten sakabanaketa eta urruntze politika salatzeko asmoz, dozenaka lagunek elkarretaratzea egin zuten Astrabuduako Josu Murueta plazan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun