Ekimenaren kartela
Bihar, igandearekin, Pottoka Eguna hartuko du Lemoizko Goikomendi zaldi-klubak, Andrakan. Ekimena hipika taldeak berak, Euskal eta Bizkaiko Hipika Federazioek eta Bizkaiko Pottoka hazleen elkarteak antolatu dute, iazko "arrakastak bultzatuta", Goikomendiko kideek nabarmendu dutenez. Eguna goizeko 10etan abiatuko dute Pottoka arrazako zaldiari buruzko erakusketa didaktiko batez. Bitartean, arratsaldeko 2ak arte umeentzako jarduerak eta eskulan tailerrak izango dira, marraztu, margotu, puzgarrietan jolastu edota globoflexia eta maskarak egiteko aukera ere emango dutela. Nahi dutenek, kortak ikusi, bertako tresnen erakusketa aztertu eta paseoa eman ahal izango dute pottokaz eta baita oroigarria eraman ere, photocall-a dela medio. Nagusiek pottoken erakustaldia izango dute aukeran eta bertan zaldiak saltzen saiatuko dira hazleek. Ordutegi berean, argazki txapelketa egingo dute eta Pottoka Proiektua zertan datzan azalduko dute, zaldi horientzako babes etxeak sortzea, alegia. Goizeko 11:45ean, Aratz dantza taldeak ekimenaren inaugurazio ofizialari ekingo dio kalejira batez. Ondoren, ohiko heziera erakutsiko dute zaldi-taldeko emakumeek. Eguerdian, heziera naturalaren adibideak jarriko dituzte. 12:30ean, zaldiberri edo poni lehiaketa izango da. Azkenik, 13:45ean sari emanaldiak emango dio amaiera egunari. Argazkian, seina hilabete dituzten bi pottoka / © Goikomendi.
Goikomendiren partaideen arabera, Pottoka Egunaren xedea arrazako zaldi hori herritarrengana hurbiltzea da, "jolas eta kirolerako duten ahalmena ezagutaraztea eta ondare gisa duten baloreaz kontzientzia sortzea". Egun hipika taldeak zortzi pottoka ditu: Fusi, Txiker, Gorbea, Higuer, Hilar, Gatika, Fuski eta Fai. Bakoiztak bere nortasuna baduen arren, ezaugarri batzuk komunak dira, hala nola, estatura txikia, izaera noblea eta beldur eza. Horrek umeekin aritzeko abantaila handia da. Pottoka Proiektuaren barruan, Goikomendik babes-etxeak bilatzen ditu abereentzako, sei hilabete bete dituztenetik aurrera eta hiru urtez zaldiek klubean hipika lanetan hasi arte. Une honetan, zazpi pottoka bizi dira zentrotik kanpo. Esate baterako, Kanijo eta Kafe Urdulizko familia batekin bizi dira eta Koheman eta Katxo Gorlizen.
Ekimenaren kartela
Ekimenaren kartela
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun