Hainbat elkarrizketaren ostean, 2008an Gipuzkoako Idiazabal herri txikian bi lagunek elkarri botatako erronka, autodeterminazioaren alde; hirugarren batek herri kirolei zien maitasuna; konfiantza, zintzotasuna, pluraltasuna; Eskozian zer gertatzen ari zeneko jakin-mina; joan-etorri kulturalak; zoritxarreko heriotza eta omenaldi polita; katalanen bat-bateko mugimendu historikoak; kultur trukaketak; Goierrirako jauzia, alderdikeria eza, dokumental bat eta hamaika gazta; gatazka armatuaren zati bat Euskal Herritik desagertzeko bidean, eta uholdea ezin galdu: 2013an, Gure Esku Dago erabakitze eskubidearen aldeko plataforma jaio zen. Hainbat hilabetez Euskal Herri mailan egituratzen eman ostean (eta Guardia Zibilak ikertzen zitueneko filtrazioak kaleratu ondoren), hasieran bezala ekin zion aurrera ekimenak. Erronka batez. Sobiet Batasuneko Baltikoko errepublikek eta Kataluniak bezala, jende katea proposatu zioten Euskal Herriari urtarrilean, hotzaren artean. 123.000 metro betetzeko 50.000 lagun beharko zirela. Lan eskerga egin dute Zelai Nikolasek, Angel Oiarbidek eta beste ehunaka lagunek bost hilabetetan asmoa egi bilakatzeko. Argazkian, Erandion buruhandiek ere deitu dute gaurko jende katera / © Erandioko Gure Esku Dago.
Eskualdean, Erandion, Leioan, Itzubaltzetan, Algortan, Berangon, Urdulizen, Sopelan, Gorlizen... horren lekuko izan gara: kartelak, esku-orriak, txandak, hitzaldiak, kateak, mahai-inguruak, megafonia, festak, kirol lehiak eta mozorroak... beti guztiei lekua eginez, atseginez. Gaur bi lagunekin hasi zen erronkak 100.000 euskal herritar baino gehiago batuko ditu herri honek bere etorkizuna libreki erabaki dezan. Eta bihar, erronka berriak izango dira.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun