UKBERRI.NETek giza katearen zuzeneko jarraipena egingo du, elkarlanez

Euskal Herriko makina bat blogarik eta komunikabidek aurreko greba orokorretan eta zoritxarreko Egunkaria auzian sustatutako bidea jarraituz, gaur dozenaka herri komunikabideok elkarlanean egingo dugu erabakitze eskubidearen aldeko jende katearen jarraipena, tartean UKBERRI.NETek. 123 kilometroz, 100.000 lagun baino gehiagoz, Durango eta Iruñea erabakitze eskubidearen aldarriz batuko duen jende katea elkarlanean jorratuko dugu irratiok, egunkariok, aldizkariok, telebistok zein orainkari digitalok. Guztioi iruditu zaigu Gure Esku Dagok antolatutako ekimena gure komunitateontzat interes informatibo handia duela, eta aukera aproposa dela hedabideon artean elkarlana sustatzeko eta, UKBERRI.NETen kasuan, baliabide apalak gainditzeko ezinbesteko baldintza. Gauzak horrela, apustu berezia egin dugu, eta kalitatezko eta anbizio handiko jarraipena egitea espero dugu, gure kasuan beti legez uribekostar eta erandioztarrengan fokua jarriz. Halere, saiakera hori antzua litzateke irakurle eta herritarren parte hartzerik gabe. Hortaz, bi eskaera egiten dizkizugu zaren irakurle horri. Argazkiak, bideoak eta abar grabatzekotan bidali bi tresna hauetariko baten batetik: Whatsapp bidez, 647 319 747 telefonora, zein kilometrotatik bidali den zehaztuz; Twitterrez, #GureEskuDago traola erabiliz eta bidaltzen duzun kilometroa gehituz honako adibideari jarraituta: #21, 21. kilometrotik bidaltzekotan. Gainera, @www_ukberri_net idatzita, zuzenean UKBERRI.NETen jarraipenean txertatu ahal izango dugu.