Uholdea, tsunamia, lurrikara, une historikoa... euskararen aldeko Korrikak ematen dituen sensatsioen antza izan dute gaur Durango eta Iruñea arteko kale, plaza eta errepideek. Nondik begiratuta ere, irudi politak, parte hartze zabala eta 150.000 pertsona baino gehiagoren asmo bateratua: Euskal Herriarentzako erabakitze eskubidea aldarrikatu eta lortzeko pausoak ematea. Itsaso horren barruan, 5.000 bat uribeskostarrek ere beraien arri koxkorra ekarri dute, Elorrion, Arrasaten eta Antzuolan, batzuetan zegokien lekuetan eta beste batzuetan ondoko kilometroak sendotzen. Irribarre, olatu, kliska, dantza, taberna ibiltari eta bestelako animazioen atzean aurpegi ezagun asko izan da. Baten batzuk aipatzearren, Jone Uria eta Fredi Paya bertsolariak, Jon Inarritu diputatua, Iñaki Zarraoa Getxoko alkate ohia, Laura Mintegi legebiltzarkidea, Konrado Mugertza Eusko Jaurlaritzako zuzendaritza kidea, Maitane Nerekan, Betitxe Saitua, Iker Jalon eta Dabid Krestelo zinegotziak edota Bittor Aboitiz Espainiako rugby selekzioko jokalaria. Argazkian, jende katea Antzuolan.
Nazioen Munduak ekimena piztu zuen dinamika Jon Maiak filmatutako "Gazta zati bat" dokumentalaren bidez ailegatu zen Euskal Herriko hamaika txokora eta milaka bihotzetara, herritarrak poztuz. Gaur hirugarren pausoa eman du autodeterminazioaren aldeko mugimenduak: alde edo epel egon diren emakume eta gizonak puztu ditu, erabakitze eskubidea plazan eskatu dezaten eta lortzeko pausoak egitea egingarria dela ikusteko. "Esanak ekintza, ilusioak jarrera eta jarrerak erabakimen" laburtu du prozesua Gure Esku Dagok. Bide horretan, "ez dago inor soberan", gogoratu du Angel Oiarbide bultzatzaileak: "guztion artean erabaki behar dugu etorkizuna". Hasierako helburua (50.000 lagun aise hirukoiztu izanak ere alaitasuna sentitzea eta festa sortzeko gogoa eragin die parte hartzaile eta antolatzaileei eta giro beroa bizi da bost ekitalditan eta ondoko orduetan. Bestalde, memoria historikoa ere kontuan hartu du antolakuntzak: giza katearen Durangoko muturra Iñaki Gorritxategik abiatu du, 83 urte dituen 1936ko gerrako umeak. Hemendik aurrera, herritarrek erakutsitako prestasunari forma ematea egokituko zaio Gure Esku Dagori. Datorren udazkenean hausnartuko dute horretaz handia espero duten batzarrean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun