Zenbait presoren helegiteak aurkeztu dituzte jada abokatuek: oso gaixotasun larriak izanik egoerarik muturrenekoetan dauden Txus Martin, Aitzol Gogorza eta Ibon Iparragirre askatzeko eskatuz helegiteak aurkeztu dituzte Espetxe Zaintzarako Zuzendaritzan, eta Ventura Tomeren zigorra eteteko eskatuz. Gaixotasun larri eta sendaezinagatik askatzeko eskaera egina duen Ibon Fernandez Iradiren kasuan, auzia aztertzeko epaiketa egin zela gogoratu dute abokatuek. Hilaren 20an ezagutuko da erantzuna.
Baionarako autobusa
Bitartean, larunbat honetarako (ekainak 14), Baionan deituta dagoen euskal preso eta iheslari politikoen nazio manifestaziora joateko autobusa aterako da Uribe Kostatik. Garraioak Plentzian (12:45), Sopelan (12:55), Berangon (13:05), Algortan (13:15), Itzubaltzeta / Romon (13:25), Leioan (13:35) eta Erandion (13:45) hartuko du jendea. Buelta manifestazioa bukatu eta ordu batera izango da. Ohiko lekuetan egongo dira izen-emateko zerrendak.
Euskal Preso Politikoen Kolektiboa (EPPK) osatzen duten 485 kideek ekainean amaituko dute Euskal Herrira ekartzeko eskaerak aurkezten, eta "zeharka" bada ere, dagoeneko hogei batek ezezko erantzuna jaso dute, Alfontso Zenon eta Maritxu Paulus abokatuek gaur jakinarazi dutenez. Letraduek azaldu dutenez, "sei hilabetean behin berrikusten du Espainiako Espetxe Zuzendaritzak preso bakoitzaren egoera, eta berrikuspen horietan ari zaizkie ezezkoa ematen. ETA ez dela desegin eta presoek ez dutela harekiko loturarik hautsi argudiatu dute sakabanaketa amaitu eta Zaballako kartzelara eramateko eskaerak ukatzeko". Beraz, Espainiako espetxeetan preso lirateke orain arte erantzuna jaso duten guztiak. Frantziako espetxeetan dituzten euskal preso politiko gehienek ere egin dituzte etxetik gertuen dauden kartzeletara eramateko eskaerak. Horiek ez dute erantzunik jaso, baina, proposamena egin zutenetik bi hilabete igaro dira. Espainian edo Frantzian egon, helegiteak lantzeari ekingo diote orain abokatuek. Egun Euskal Preso Politikoen Kolektiboa osatzen duten lagunen artean Uribe Kostako 25 bizilagun dago. Horietatik bost Frantziako espetxeetan dira eta gainontzekoak Espainiakoetan. Argazkian, presoen aldeko manifestazioa Algortan, artxiboko irudian.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun