Maiatzaren 20ko lan-istripua zerk eragin zuen jakiteko abiatutako ikerketa hasi arte, Liburutegi Nagusiko teilatuko lanetan Gaimaz enpresakoak ez ziren beharginak zeudenik "ez zekiela" adierazi du gaur Euskal Herriko Unibertsitateak (EHU), Euskadiko CCOO sindikatuak hildako langileak "kontraturik ez" zuela zabaldu ostean. Gaimazek Portugaleteko Lan Ondo Multiservicios azpikontratatu omen zuen obra egiteko. Alabaina, hildakoa "ez zen enpresa horretakoa" eta "kontraturik gabe" ari zen lanean, sindikatuaren arabera. Plazaratutako adierazpenean EHUk esan duenez, "hasiera batean, igarri daiteke, lanak hirugarren batzuei azpikontratatzeko betekizun legal zehatz batzuk urratu egin zituela Gaimazek; langileen segurtasun neurriak eta osasuna bermatzera zuzenduta daudenak, alegia". Hala ere, "erantzukizun guztia" enpresa kontratista eta balizko azpikontraten gainean jarri du Euskal Herriko Unibertsitateak, laneko arriskuak saihesteko araudian oinarrituta. Halaber, sabai-leihoen egoerak zorigaiztoko gertaeran "eraginik ez" zuela izan uste dute EHUko arduradunek. Argazkia: © EHU.
EHUtik azaldutakoaren arabera, "horretarako gaitutako pertsonalak egiaztatu zuen uneoro zer nolako baldintzatan zihoazen instalazioetara Gaimaz enpresako langileak". Halaber, gertaerak argitzen laguntzeko asmoa berretsi du Unibertsitateak, erantzukizunak zehaztu aldera.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun