Aurreko edizioetan bezala, Kosta Trail eskualdeko itsaslabarretako bide eta bidexketatik igaroko da. Sopelako udaletxean izango da irteera eta, kostara iritsi aurretik, bide zati berria inguratzen duten pinu eta eukaliptozko basoak zeharkatuko dituzte, Munarrikolanda mendira iristeko. Igoera malkartsuak dituzten 10 kilometro berriek korrikalariak probaren hasieratik mugiaraziko dituzte. Kostako paraje paregabeetatik igarotzen den ibilbide guztiak (30 km) bista ikusgarriez gozatzeko aukera emango die korrikalariei. Proba zoru mota ugaritatik igaroko da: asfaltoa, harea, lurra, belarra, zementua… eta hori izango da korrikalariek gainditu beharreko erronka nagusia.
Aldapan gora eta behera
Korrikalariek irteeratik oso gertu, Sopelan, topatuko dituzte lehen aldapak. Ibilbide osoan gainditu beharreko malkarren artean batzuk baino ez dira izango hasierako horiek. Lehen kilometroak pasatu ondoren, parte-hartzaileak kostalde guztia zipriztintzen duten bide estuetatik igarotzen diren Azkorri eta Barinatxe hondartzetara jaitsiko dira. Barrikako baso batean ezkutatutako bideak eginez, Plentziara helduko dira eta handik berriro ere Sopelarako bidea hartuko dute, prestatu duten ibilbidearen tarte berria eginda. Tarte horretan aldapak ziurtatuta egongo dira helmugara iritsi aurretik. Udaletxe plazan lehen ibiltariak dagoeneko zain egongo dira lasterketako parte-hartzaileak agurtzeko.
Igande honetarako, maiatzak 15, Kosta Trail lasterketaren bederatzigarren edizioa antolatu du Forum Sport-ek, Sopelako Udalaren lankidetzarekin. Lasterketaren (30 kilometro) modalitateko izen-ematea itxita dago jada, baina mendi-martxan (30 km) eta martxa familiarrean (11km) izena eman daiteke oraindik, Forum Sport-eko dendetan edo www.kostatrail.com web orrian. Dagoeneko martxetan 2.800 lagunek eman dute izena, eta 481 kirolarik parte hartuko dute lasterketan. Gainera, aurreko egunean, larunbatean, proba honekin lotutako solasaldia izango da Sopelako Kurtzio kultur etxean. 18:00etatik 18:30ak arte Kosta Trailaren ibilbidearen inguruko hitzaldi tekniko bat eskainiko dute. 18:30etik 19:40ak arte Nuria Picas 2012. urteko Ultra Trail munduko txapeldunak “Bizitza bat” lelopeko mintzaldia eskainiko du. Eta amaitzeko, 19:40etatik 20:00ak arte “100 miliako bidaia” labur-dokumentala proiektatuko da. Gonbidapenak 17:00etatik aurrera jaso daitezke Kurtzion. Azken urteetan legez, Kosta Trail probak batzen duen dirua elkarte solidario bati emango diote. Kasu honetan, eta zazpigarren urtez, Esklerosi Anizkoitzaren Eugenia Epalza Fundaziori. Argazkian, Kosta Trail lasterketa artxiboko irudian / © Sopelako Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun