Herrigune egitasmoak antolatuta, Ezagutzen Azokaren lehenengo edizioa egingo dute bihar, larunbata, Leioako Bulebarrean. Hitzordua 16:00etatik 19:00etara jarri dute. Bertan, pertsonak harremanetan jarriko dira dauzkaten ezagutzak komunitatean partekatzeko, beste batzuengandik ikastearekin batera. Parte hartzen duten pertsonek aldez aurretik Leioaztarren Ezagutzen Sarean gai ezberdinen gainean dituzten ezagutzak zein jakinminak eskaini edo eskatu dituzte", azaldu dute udal iturriek. Dena dela, azokako ikastaldi guztiak publikoaren parte-hartzeari irekiak izango dira. Gaiak honakoak izango dira: ingelesa, euskara, eskumuturrekoak egitea, argazkigintza, joskintza / jantzigintza, kakorratz-lana, aulkiak tapizatzea eta astronomia. Bestalde, "Zientzia kalera" lelopeko ekimenaren bigarren kaleko saioa ere egingo dute. Aipatu jarduerak ikasteko eta ikasitakoa partekatzeko aukera eskaintzen du, pertsonen interes eta errealitateei egokituz. Mahaiak, ura eta argindarra egongo dira. Talde handi zein txikietan parte hartzeko aukera dago, bakarrik ala familiartea... Horretan parte hartzeko: info[abildua]herrigune.org / 944 029 780. Argazkian, maiatzaren 10ean egindako saioa / © Leioako Udala.
"Maiatzaren 10ean lehen jardunaldi bat egin zen. Zientzia modu askotan egin daitekeela frogatu zen bertan: Legoekin, fisika eta kimika materialekin, ordenagailuekin… eta baita kartoizko kutxekin ere. Orduko parte-hartzaileetako batzuek errepikatu egingo dute oraingoan, eta egon ez zinetenak… garaiz zabiltzate oraindik honakoan parte hartzeko!", azaldu dute Udal leioztarretik.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun