Biharamuneko pilularik saltzen ez zuelako, Algortako Illeta kaleko Jimenez Sesma farmazia ondoan egin zuten kontzentrazioa zortzi neskek. Protestaldia iraun artean, esku-orriak banatu zituzten inguruan zebiltzan herritarren artean. Horretaz gain, pare bat sartu ziren botika-dendara biharamuneko pilulaz galdetzera. Lehenengoari "goizean amaitu" zitzaizkiola esan zion botikarietako batek, besteari galdetu ostean. "Ia biharko eskatzerik bazuten, baina biharko berandu izango zelakoan, beste farmazia batera joateko", azaldu zuten Uribe Kostako Koordinadora Feministako kideek. Nesken arabera, "kanpainaren jakitun zirelako" erantzun zuten horrela. Bigarren bat protestaren berri ematen saiatu zen. "Ez saltzeko eskubide osoa" dutela esan zion horri botikarietako batek. Neskak horretaz informatzen baino ari ez zirela erantzun zion, "horretarako eskubidea" badutela eta, behin hori jakinda, jendeak aukera dezala non erosi eta non ez.
Zortzi feminista eta lau ertzain
Pankarta batzear zirela, 19:00etan, Ertzaintzaren patruila bat agertu zen Sarrikobaso eta Illeta kaleen arteko bidegurutzean. Agenteetako bat nor edo nor identifikatzearekin tematuta zebilen eta neskak, bitartean, azalpen eske. Handik bost minutura agertutako beste patruila auto bateko agentea saiatu zen "bakea jartzen". Dei bat jaso zutela onartu zuen agenteak, seguru asko farmaziatik bertatik, baieztatu ez zuen arren.
"Espazioaren erabilera" zela eta horrek "komunikazioa" behar zuela gora eta behera, denbora batez iritzi elkartrukean aritu ostean, pankarta batu, eta gauzak zeuden bezala uzteko prest agertu zen "bitartekari" lanak egiten zebilen ertzaina. Hori bai, hurrengoetarako komunikatzeko esan zein feministei. Baina, neskak alde egiten ari zirela, farmaziara sartu zen agenteak "momentu batez itxaroteko", "frogagiri gisa bateren baten datuak" behar zituela bota zien. "Bitartekariak" ziurtatu zien neskei "salaketarik ez" zela, baina baten identitatea behar zuela, "zortziei DNIa eskatu behar ez izateko". Mesfidati, batek eman zuen DNIa.
Algortako Jimenez Sesma farmazia aurrean batutako zortzi emakumeetatik bat identifikatu ostean alde egin zuten atzo ertzainek. Uribe Kostako Koordinadora Feministak deituta, Illeta kaleen, Sarrikobasoko bidegurutze ondoan, egin zuten kontzentrazioa neskek, botika-dendan biharamuneko pilularik ez dutela saltzen salatzeko. Pankarta batuta zeukaten jada. Eta etxerako bidea hartuta zeukaten emakumeek. Halabaina, auzia hurrengo batean elkarretaratzea komunikatu behar zutela ohartaraziz amaituko zela zirudien arren, "momentu batez itxaroteko", "bateren baten datuak" behar zituela esan zien lehenago saltoki barrura sartutako poliziak. "Salaketarik ez" zegoela baieztatu zien ertzainetako batek. Hori horrela, datuak eman zituen emakumeetako batek. Horrela egin ezean, zortziei DNIa hartu beharko ziela esan zien aurretik "bitartekari" lanak egiten ari zen uniformedunak. "Osasunik ez, ondasunik bez!" lelopeko kanpaina abiatuta zuen maiatzaren 28an Uribe Kostako Koordinadora Feministak, herritarrei kondoirik edota biharamuneko pilularik saltzen ez duten eskualdeko farmazietan ez erostea eskatzeko. Orain arte sei botika-denda identifikatu dituzte Algorta, Areeta, Getxo, Itzubaltzeta / Romo, Leioa, Erandio eta Plentzian. Argazkian, feministak eta ertzainak iritzi elkartrukean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun