Plentziatik igarotzen den BI-2122 errepidea hobetzeko lanak ahalik eta lasterren abiatzea eskatu diote Batzar Nagusiek Bizkaiko Foru Aldundiari. Herri Lan eta Garraio Batzordeak aho batez onartu zuen atzoko bilkuran PSE-EEk aurkeztutako arauz besteko proposamena. Horrenbestez, Plentziako Udalarekin elkarlanean, aipatu errepidean bide-segurtasuna hobetzeko beharrezko neurriak lehen bai lehen hartzea agintzen zaio foru erakundeari. Behin baino gehiagotan ohartarazi dute Gatzamineko auzokideek inguru horretako arriskuez: bihurgune arriskutsuak, espaloirik gabeko errepide zatiak, norabide bakarrekoak, aparkatzeko toki falta... Hori gutxi balitz, Metro Bilbao, Bizkaibus eta taxi geralekuak daude bertan. Inguruko eskola, institutu eta haur-eskolako guraso eta langileek ere arriskuez ohartarazi dute behin baino gehiagotan. Sinadura bilketa eta erakundeei gutunak tartean, igande honetan (ekainak 15), 12:00etan, kontzentrazioa izango da metro geltokiaren ondoan. Argazkian, Plentziako metro geltokia / cc-by Javier Mediavilla Ezquibela.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun