BBK Mundialtxoa 2014 txapelketarako sarrerak guztiz doakoak dira BBK-Kutxabank txartelak erabiltzen badira. Zelaira joan nahi duten guztiek txartel bakoitzarekin gehienez bina sarrera atera ahal izango dituzte finantza erakundearen kutxazainetan. Zelaira sartzeko guneetan nahitaez aurkeztu behar dira gonbitak, eta ezingo da sartu paserik ez daukana.
Lamiakotik Sarrienara
Mundialtxoa Lamiakon hasi zen 2005ean, orduan birmoldatu baitzen futbol zelaia BBKren laguntzaz eta, ordudanik, jatorri eta kultura desberdinetako pertsonen arteko "kirol eta gizarte topaketa" bihurtu da, eta etorkin taldeen gizarteratzea sustatu nahi du kirolaren bidez. 2009an, Lamiakoko zelaietatik Sarrienako instalazio modernoagoetara aldatu zen txapelketa, eta gaur gaurkoz jokaleku paregabea izaten jarraitzen du elkarbizitzarako eta etorkinak gizartearen eguneroko funtzionamenduan sartzeko.
BBK Mundialtxoa txapelketa Leioako Sarriena futbol zelaian ospatuko da aurten ere, eta larunbat honetan, ekainaren 14an, etorkinen eta zenbait agintariren artekoa izango da jokatuko den lehen partida, 15:30ean. Euskal Herrian sustraituriko kultura guztien arteko adiskidetasun eta bizikidetza loturak sendotzeko helburuarekin, futbol partida asko izango dira ekaina eta uztaila bitartean, "kirolaren eta kulturen arteko bizikidetzaren festa handi" honetan, BBK-ko iturriek adierazi dutenez. Mundialtxoaren norgehiagokak larunbatero izango dira uztailaren 19ra arte, Sarrienan. Sei jardunaldi horietan kontinente guztietako gizonezko eta emakumezkoen futbol taldeek jokatuko dute, atzerritarrez eta bizkaitarrez osatuta. Finalak uztailaren 26an izango dira: emakumezkoena 16:00etan eta gizonezkoena 18:00etan. Sarrienako zelaiek 15:30ean zabalduko dituzte ateak, norgehiagoka ikusi gabe geratu nahi ez duten guztientzat. Argazkian, orain bi urteko emakumeen finala / © BBK.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun