Joan den ostegunean ohiko ordutegia aldatu zuten Algortako Fadura kiroldegiko kanpoko igerilekuek, udako denboraldikoa izatera pasatzeko. Hala, hiru hilabetez (irailaren 14ra arte), igerileku olinpikoa asteko egun guztietan erabili ahal izango da 08:00etatik 21:30era eta kanpoko gainerako guneak –berdeguneak, zabuak eta umeen igerilekuak– 10:00etatik 21:30ak arte. Igerilekuetako erabiltzaileek kafetegiko zerbitzua astelehenetik ostiralera, 12:00etatik 20:00etara, izango dute eskura (asteburuetan eta jaiegunetan 11:00etatik 20:30era). Ostegunean ere Torresoloko kanpoko igerilekuak zabaldu zituen Leioako Udalak. Aurten, gainera, berrikuntzak izango dira herritarrei kirolgunera sartzea errazteko: txartel bakarra, Torresolon bazkidetzea, sarreren salmenta eta erreserbak / informazioa on-line. Bitartean, Sopelako auzoak metro geltoki eta hondartzekin lotzen duen autobusak, udako ordutegia du atzotik (ekainak 15) aurrera. Irailaren 15era arte, Sopelbusak maiztasun berriak ditu. Aurten ere ordutegia jarraia izango da: autobusa martxan egongo da 07:00etatik 20:00ak arte, eguerdian atseden hartu barik. Bidai bakoitzak 0,70 euroko kostua izango du, baina 10 bidaiako bonoa erosteko aukera egongo da 5 euroren truke. Argazkian, Sopelbus / © Sopelako Udala.
Astelehenetik ostiralera, 07:00etatik 09:30era ohiko neguko ordutegia eskainiko du Sopelbusek, Atxabiribll eta Arriatera hondartzak Larrabasterrako metroarekin lotuz (08:00etatik 09:30era osasun zentroan, elizan, Urbaso tabernaren aurrean, egoitzan eta haurreskolan ere geldituko da). Udako ordutegian, berriz, 10:00etatik 20:00etara, sopeloztarrek eta bisitariek autobus bi izango dituzte eskura. Lehenengoa Larrabasterratik irten eta Arriatera hondartzara helduko da; eta bigarrena nagusien egoitzatik irten eta Atxabiribileko aparkalekura helduko da, ordu erdiko maiztasunarekin.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun