Bederatzigarren edizioa izan du aurtengoa Kosta Trail lasterketak, eta urtero legez Forum Sport, Salomon eta Laboral Kutxa izan dira antolatzaileak, Sopelako Udalaren lankidetzarekin. Saioa Villanueva alkateak eman zien hasiera probei. Modu mailakatuan hasi ziren probak, baso eta hondartzak zeharkatu eta berriro udaletxe plazan amaitzeko (aurtengo ibilbidea zirkularra izan baita). Lehenengo korrikalariak lasterketakoak (30 km) ziren, 09:00etan. Horren ostean mendi-martxa (09:15) eta martxa familiarra (09:30) hasi ziren.
Probaren bideo laburpena (© Inforpress)
Kosta Trail probaren ediziorik arrakastatsuena izan da aurtengoa. 4.200 lagunek baino gehiagok parte hartu zuten atzo, igandea, Sopelan hasi eta amaitu den proban, tokiko iturriek adierazi dutenez. Walter Becerra Sestaon bizi den venezuelarra izan zen txapelduna lasterketa lehiakorrena, ibilbidea ordu bi, 18 minutu eta 55 segundotan eginez. Hasiera-hasieratik egon zen lasterketaren buruan eta gainontzeko korrikalarien erritmoa markatu zuen. Irabazlea pozik agertu zen, baita harrituta ere, Kosta Trailaren paisaiekin, ikusteko tarte askorik izan ez zuen arren. Emakumezkoei dagokienez, Nuria Picas kataluniarra izan zen irabazlea, ordu bi, 44 minutu eta 54 segundoko denborarekin. Emakume sopeloztarrik onena Amagoia Legarra izan zen, helmugara hirugarren helduz; 3 ordu, minutu 2 eta 4 segundoko denboraz. Gizonezkoetan, Roberto Garay izan zen sopeloztar onena; ordu bi, 35 minutu eta 49 segundorekin (laugarrena sailkapen orokorrean). Argazkian, korrikalariak abiatzeko prest atzo / © Roke - Inforpress.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun