Horretaz gain, jai parekideak gura dituzte. "Emakumeen parte-hartzea jaietako ekimen guztietan bultzatuko da. Halaber, jai batzordeak lan egingo du jai-eremuan inolako eraso sexistarik eman ez dadin", azaldu dutenez. Halaber, euskararen erabilera bultzatuko da jaietako ekintzetan, "Zapia lepoan eta euskara ahoan!" leloari helduz.
Herri-bazkarian 400 baietz!
Aurtengo jaiek hainbat berritasun izango dituzte. Besteak beste, umeek herriko jaietako antolakuntzan parte hartzeko aukera izan dute. Antolatutako “ametsetako jaiak marraztuz” saioarekin, haien ideia erakargarriak zeintzuk diren ezagutzeko eta gauzatzeko aukera izan dute. Ildo horretan, labirintoa, hondartzen jokoa, umeek egindako lorategia, disko-festa, buruhandiak egiteko tailerra, kalejira, kanpaldi familiarra ipuin kontalari eta guzti, izango dira.
Beste alde batetik, iaz Sopelako herri-bazkarian 300 pertsona elkartu ziren,. Aurten erronka 400 elkartzea da. Menu berezia egongo da umeentzat, eta ludoteka zerbitzua. Txartelak salgai daude jada Sopelako turismo bulegoan eta Laiak tabernan. Auzokideek etxetik eraman beharko dute edalontzia eta sardexka.
Koadrila jaitsiera dagokionez, Sopelako jaietako osagai nagusietako bat izango da (aurten txosnetatik udaletxe plazaraino, bertan egingo dute dantza). "Lehen gazteek gauez joaten ziren jaietara, gaur egun, ordea, egun osoko jaiak dira!", azaldu dute antolatzaileek.
Aurten, gainera, jai batzordeak ahalegin berezia egin du Larrabasterrako jaiak indartzeko. Bigarren urtez itsasoko izakien kalejira egingo dute: "marrazoak, surflariak, arrantzaleak, olagarroak, karramarroak... hartu zuen mozorroa!".
Elizako kanpaiak joz
Horrez gain, bestelako ikuskizunak ere egongo dira. Falcons de Vilafranca taldea Penedes eskualdetik helduko da, kataluniar kultura bultzatuz.
Gainera, ekainaren 28an 14:00etan kanpaiak jo eta bolanderak jaurtiko dira. Izan ere, jai batzordeko kideen hitzetan, "kanpaien hotsak komunikazio tresna itzela izan dira mendeetan zehar". Sopelan ere, sopeloztarrei mezu desberdinak helarazteko erabili izan ohi dira, adibidez, herriko jaiak iragartzeko. Horrela, ohitura zahar hori berreskuratzeko asmoz, aurten, San Pedro bezperan, bolanderak botatzearekin batera, elizako kanpaiak joko dira bost minututan zehar.
Bestalde, ohi den legez jaietan izen handiko musika-taldeak eta talde lokalak egongo dira. Sopelan: Estricalla, Akatz, Trikizio, Makulu Ken, Last Fair Odi, Urrats, Deal, Mac Onak, Dingos & Flamingos, Melmak eta Luhartz. Larrabasterran, berriz, Willis Drumond, Niña Coyote y Chico Tornado, Arcada Social, New York Ska Jazz eta Arma Masiva taldeek joko dute.
Azkenik, Sopelako Jai Batzordeak sopeloztarrak eta bisitariak jaiez gozatzera gonbidatu ditu, beti ere auzokideak errespetatuz.
Sopelako jaien egitaraua (pdf)
Jaietako iragarki mundiala
Sopelako Jai Batzordeak larunbatean aurkeztu zituen udalerriko aurtengo festen egitarauak, Kurtzio kultur etxean egindako ekitaldian. San Pedro jaiak ekainaren 26tik 29ra izango dira eta herriko ikastetxeetako (Zipiriñe, Ander Deuna, Iberre eta Helduentzako Hezkuntza Iraunkorreko zentroa) ordezkariek piztuko dute txupina. Izan ere, jai batzordeak nabarmendu gura izan du "eragile hauek euskal kultura eta euskararen alde egiten duten lana". Larrabasterrari dagokionez, uztailaren 11tik 16ra luzatuko dira Karmen jaiak; eta Sopela Kantarik piztuko du suziria. Talde hori aurten sortu da eta kale eta auzoetan kantatzeko ohitura berreskuratu gura dute. Eta ezin ahaztu uztailaren 20ko Santa Marina eguna. Sopelako jaiak parte-hartzaileak izatea da udal ordezkariek, elkarteek, koadrilek eta auzokideek osatzen duten batzordearen helburua: "sopeloztarrak ez izatea ikusle hutsak eta jaietako aktore nagusiak izatea", adierazi dutenez. Horretarako adin eta gustu guztietarako egitaraua prestatu dute: koadrila jaitsiera, koadrilen arteko jokoak, herri-bazkariak, batukada partehartzaileak, tortilla eta sangria txapelketa, makailao txapelketa, sopel-tribial, eta abar. Argazkian, aurtengo jaietako kartel lehiaketaren irabazlea Aitziber Onaindia (erdian) 22 urteko sopeloztarra izan da. Herriko kartelik onenaren saria Naiara Etxaiz-ek irabazi du, eta umeen kategorian Mikel Bommarito izan da txapelduna / © Sopelako Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun