EH Bilduren Sopelako Udal Gobernuak deituta, 40 bat lagunek egin dute ordu laurdeneko kontzentrazioa, gaur eguerdian, udaletxe sopeloztarraren aurrean. Madrilen izan den Felipe VI Espainiako errege eta Bizkaiko jaunaren koroatzea gaitzetsi eta Euskal Errepublika aldarrikatu dute modu horretan, ikurrinak eta nafar ikurrak eskuetan hartuta. Kataluniako bandera ere ikusgai egon da, bateratzea TV3 Kataluniako telebista publikoaren arreta piztu duela eta. Elkarretaratzean izan dira Saioa Villanueva alkatea, Alain Goldaraz alkateordea eta Fernando Garcia zinegotzia; Iker Rodrigo Sortuko kidea; udaletxeko hainbat langile; herri mugimenduko kideak eta auzokideak. Kontzentrazioari irrintzi bik eman diote amaiera. Argazkian, gaurko kontzentrazioa Sopelako udaletxe aurrean / © Sopelako Udala.
Sopelan ez ezik, Euskal Herrian hainbat mobilizazio izango dira, bai Euskal Errepublikaren alde; baita Espainiako III Errepublika aukeratzeko erreferenduma aldarrikatzeko ere. Besteak beste, Bilbon goizeko 12etan udaletxean egin eta 20:30ean Uribitarte kaian ekitaldia antolatu du EH Bilduk. Hiribildu bereko Arriaga plazatik, baina 20:00etan, "Monarkiari ez, hiritarrek erabaki" lelopeko manifestazioa abiatuko da, EH Bildu, Ezker Anitza-IU, Ahal Dugu (Podemos), Equo, Iratzarri-EKI, Alternativa Republicana, Antikapitalistak, Circulo Republicano, Colectivo Republicano de Euskal Herria, Gazte Komunistak, GKB, Goldatu, Ikasle Ekintza eta URE Orduña taldeek deituta.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun