Arbasoengandik ikasitako jentilen usadioari jarraiki, gaur sua izango da udako solstizioari ongi etorria emateko protagonista nagusia. Algortako Zubilleta auzoan, Barrikan eta Leioan bezala (azken bi horietan bihar amaituko dira bertoko jaiak), Berangoko Lantzarteko zelaietan neska-mutilen ilusioa ere piztuko dute sugarrek. "Gaur jaia" izeneko haurrentzako dantzaldia izango da bertan, 19:00etatik aurrera. Ondoren, hurbildutakoen artean txokolatea, "txoripanak" eta sagardoa banatuko dute. Mokadu ezin hobea Xaibor DJak eskainiko duen saiorako indarrak hartzeko. Bitartean, Algortan, Umeen San Juan sua antolatuko dute hainbat elkartek. Telletxe plazan izango da, 17:00etatik aurrera. Getxoko Txorimalo gaztetxean, berriz, Solstizio Gaua ospatuko dute txistorra-jana (20:00), txokolatada (20:30), sua (22:00), eta ondoren, txalaparta, edabe magikoa eta giro paregabea izango direla.
Sopelan, San Juan Txiki egingo dute. 20:00etan, Txarlestrup-en ikuskizuna eta ondoren txokolatada izango dira udaletxeko plazan. Horretaz gain, 22:00etan sua piztu eta Kolpes Blai batuka taldeak alaituko du giroa. Gorlizen, 22:00etan Errementari Bidean jarri dute hitzordua, txokolatea eta queimada dastatzeko. Bestalde, Astrabudua Madaripe zelaian, tailerrak, musika eta animazioa egongo dira 18:30etik aurrera. Eta San Juan sua eta dantzak suaren inguruan, 22:30etik aurrera.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun