Gaur jorratuko diren gaiei dagokienez, Arrakala heteroarauean zirrikituak sortzeko asmoa duen proiektua pasa den martxoaren 31n abiatu zuten Bilgune Feministak eta Topatu.info-k elkarlanaz. Transfeminismoen kasuan, 2010eko urtarrilaren lehenarekin batera aurkeztu zuten Iraultza Transfeministarako Manifestua. Horren arabera, feminismoa ezin da izan soilik emakumeen multzoarena, arauek baztertutako sektore guztiei muzin egitea nahi ez badu. Iazko abenduan, "Transfeminismos, epistemes, fricciones y flujos" liburua argitaratu zuten Miriam Sola eta Elena Urkok, feminismoa birpensatzeko eredu berriez.
Arrakala proiektuaren sorrera bideoa (© Arrakala)
Gaur, asteartea, arratsaldeko 6:30etik aurrera, "Askatasun sexualengatik borrokan" izeneko mahai-ingurua hartuko du Algortako Villamonte kaleko kultur etxeak. Bertan, hurrenez hurren, Arrakala proiektua eta transfeminismoen berri emango dute Algortako Bilgune Feminista eta Donostiako Medeak taldeko kide banak, Mujeres con Voz elkarteko partaide batek moderatuta. Bihar, toki berean baina 19.00etan, "Percepciones de la juventud en torno a la homofobia" izeneko solasaldia eskainiko du Jesus Estomba psikologoak, pertsona gay, lesbiana, bisexual eta transexualen arretarako Eusko Jaurlaritzako Gipuzkoako Berdindu zerbitzuko arduraduna eta LGTB Gehitu elkarteko kidea. Ekimena Getxoko Udalak antolatu du, ekainaren 28an aldarrikatzen den Gay, Lesbiana, Bisexual eta Transexualen Eskubideen Nazioarteko Egunaren harira. Argazkian, Arrakala proiektuaren partaide batzuk / © Arrakala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun