Algortako Aldapa kaleko 23. zenbakian bizi zen familiak 30.000 euroko zor bati aurre egin behar zion. Halere, gaur Sendiak azaldu duenez, Jesus Alvarezek erdia baino ez zuen jaso 2009an, 500 euroko billetetan. Beste erdia, inoiz kobratu ez zuen txeke batean sinatu zioten. Izan ere komunitateari zor zioten 12.000 bat euro ordaintzeko eskatu zioten dirua mailegu emaile pribatu bati, interes tasa altuan. Horregatik, maula eta kapitala zuritze delituak egin zituztelakoan, bide penaletik salaketa jarri dute etxea eskuratu duen enpresaren eta jabearen aurka. Halere, Getxoko justizia jauregiko epaile dekanoaren babesik gabe maula hori burutu izana ezinezkoa izango zelakoan daude. Horregatik etxe-gabetzeko prozedura guztia baliorik gabe uzteko eskatuko dute. Rosa de La Fuente Sendiako eleduna oso ezkorra izan da Info7 irratian egindako elkarrizketan, herri honetan kaleratzeak noizbait erabat geldituko diren galdetuta, "putre guztiak honetaz ari baitira baliatzen negozioa egiteko".
Ezer barik
Senar-emazteak eta 20 eta 28 urtetako bi semek atzean utzi behar izan dute urteetan berea izan den etxebizitza, egun mailegu enpresa batek salgai-hondar prezioan eskuratu duena. Ertzainek ez diete utzi beraien gauzak hartzen eta, hortaz, soinean dutena besterik ez dute. Gaurko gauetik aurrera, Getxoko Udalak ordaindutako pentsioan lo egin ostean, familiak ez du izango nora jo, seme batek duen ordukako lantxo bat kenduta partaide guztiak langabezian daudela. Aitaren langabezi laguntzarekin batera, ozta-ozta heltzen dira hilero 800 euro irabaztera. Egoera horren aurrean, Aitor Torre Urresti Euskal Herriko Bilduren batzarkideak Bizkaiko Foru Aldundiari eskatu dio hutsik dituen 88 etxebizitzetako bat sendi honi uzteko.
Garaipen gazi-gozoa
Pasa den maiatzaren 13an, Aldapakoek dozenaka lagunen babesa jaso zuten, tartean Euskal Herria Bilduren hiru zinegotzi, eta horri zein Sendia kaleratzeen aurkako plataformak abiatutako defentsa legalari esker behin-behinean gelditu zuten orduko etxe hustea. Halere, familiak ohartarazi zuen etxerik gabe gelditzeko arriskua bere horretan mantentzen zela. Sendia, bere aldetik, penatuta agertu zen Imanol Landa Getxoko alkateak erantzun ez izanagatik eta Getxoko Gizarte Zerbitzuek etxe babesa ez emateagatik. Halere, Getxoko Udalak agindu zuen Gizarte Zerbitzuek "beren baliabideak eta laguntza eskaini" zizkiotela etxe-gabetzeko agindua duen familiari. Gaur, azken hori lau pertsonentzako pentsioa bilakatu da, gau bakar batez, Sendiaren arabera.
Gaurko etxe-gabetzea argazkitan (© Getxotik_aske eta Maribi Ugarteburu)
Egun tristea eta amorruz betea izan da gaur Algortako Aldapa kalean. Goizeko 10ak baino lehen, etxetik kaleratzera zihoazen familiarekiko elkartasunez dozenaka senide, auzokide eta hiritar metatzen joan da Aldapako 23. atariren ondoan. Ordurako jada gunea hartuta zeukan Ertzaintzak, epailearen aginduak betetzeko prest. Izan ere, 30.000 euroko zor batengatik Jesus Alvarez eta bere familiari jada bahitutako etxetik botatzeko erabakia hartu zuen atzo Getxoko auzitegiko epaile dekanoak, Sendia elkarteak aurkeztutako helegite guztiak atzera bota ostean. Gaur, ertzainek muzin egin diote komunikatutako elkarretaratzeari eta bildutako 150 bat lagunen aurka oldartu dira, hainbat zauritu eraginez, jendea etxebizitzako ataritik urruntzen lortu arte. Etxe barruan ere, pare bat dozena lagun saiatu da eusten koltxoiez eta altzariz babestutako ateari, baina ertzainek aurretik eraman dute eta banan-banan lagun guztiak atera eta identifikatu dituzte. Ostean, familia kanpora eraman dute eta auzitegi-idazkaria sartu da. 13:00ak aldera amaitu dute etxe-gabetzea. Tartean, 29 urteko gizonezko bat atxilotu eta Neguriko ertzain-etxera eraman dute, "autoritateari desobedientzia larria eta erresistentzia" leporatuta, Segurtasun Sailak baieztatu duenez. Auzokide batzuek mehatxuak salatu dituzte eta Maribi Ugarteburu Euskal Herria BIlduren legebiltzarkidearen arabera, "ertzain batek ukabilkada eman dio bizilagun bati Aldapa 23ko etxe kaleratzean, identifikazio plakari buelta emanda". Halere, une honetan etorkizun beltzena kaleratutako familiak dauka. Hilabete luze bat Getxoko Gizarte Zerbitzuen laguntza eskatzen ibili ostean, gaur lo egiteko pentsio bat besterik ez diotela eskaini salatu du Rosa De la Fuente Sendia elkarteko kideak. Maiatzaren 13an, behin-behinean atzeratzen lortu zuten aurreko etxe-gabetzean jada salatu zuten Imanol Landa alkatearen eta udal zerbitzuen utzikeria. Gaur ere, bertaratu ez izana leporatu diote Landari eta 17:00etan abiatuko den Getxoko Udalbatzara joateko deitu dute, kontu eske. Argazkian, gaurko etxe-gabetzeko irudi bat / © Getxotik_aske.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun