Getxoko Udalbatzak atzeratu du Aldapa 23ko familiaren egoera aztertzea

Erabiltzailearen aurpegia Ukberri 2014ko eka. 25a, 21:53

Getxoko Udalbatza bildu zen atzo, goizean Ertzaintzak Algortako Aldapa kaleko 23. zenbakitik kaleratutako familiarekiko elkartasunak saio osoa baldintzatu zuela. Dozenaka auzokide igo ziren Aldapatik Negurira eta Imanol Landa alkateari –"getxoztar guztion ordezkaria baitzara" esan zion negarrez atso batek–, Udal Gobernu jeltzaleari eta zinegotzi orori eskatu zieten "lotsagabeko maula pairatu" duen familia hori babestu, ostatatu eta etxea berreskuratu dezan lan egitea. Kaleratze unean non egon ziren ere itaundu zieten hautetsi guztiei, bertan egondakoak ziren EH Bildukoei, baita alkateari ere, aurreko asteburuan Arenas futbol taldeak jokatu eta galdu zuen play-off-a dela eta Madrilera joan eta Alcorcongo tribunan "partida gozo-gozo" ikusi zuen bitartean Aldapa 23ra hurbildu ez izana leporatu ziotela. Alkateak goiz horretan Gizarte zerbitzuekin batera familiaren alde lan egiten jardun zuela erantzun zien. Tartean, goizean Ertzaintzak erabilitako bortizkeria salatu eta horren erantzule nor zen jakin dadin aldarrikatu zuten auzokideek. "Piztiek bezala kolpatu gaituzte. Ertzain horiek gu atxilotzeko egon direnak, gu babesteko daudela esaten dutenak, kolpatu eta gure etxetik atera gaituzte", salatu zuen Aldapako andra batek. Horretaz gain, direnak eta ez direnak aurpegira esan zieten politikariei, aho bizarrik gabe. Gutxienez, lau auzotar kaleratu zituzten kalez jantzitako udaltzainek alkatearen aginduz. Argazkian auzotarrak hitza eskatzen.

Izan ere, udal bilkurak hasieran 19 puntuko gai zerrenda izan behar zuen baina hasi baino ordu bat lehenago Aldapako auzia ekarri zuen EH Bilduk presazko mozio batez. Mozio hori dela eta Bozeramaileen Batzordea deitu zuen alkateak eta ezker koalizioa ez ezik talde batek ere ez zuen eztabaidatzeko asmoa agertu. Udalbatza berandu hasita, mantso zihoan aurrera, eta Aldapako auzokideek pazientzia galdu eta behin eta berriro hartu zuten hitza, etxe-gabetzearen puntua aurreratu zedin, arauez hotsa hautetsiei soilik ematen zaien arren.

Irregulartasun franko etxe-gabetzea eragin zuen maileguan eta auzian

Gauzak horrela, herritarrak aretotik bidaltzeak kontuak oker lituzkeelakoan Landak azken hilabetean familiari aholkua ematen ibili den Rosa de La Fuente Sendia plataformaren kideari hitza eman zion. De la Fuentek gogoratu zuen goizean AC Asesoria Integral a Empresas y Gestion de Creditos SL enpresak Jesus Alvarez (Udalbatzan egon zena), bere emaztea eta beraien bi semeen etxea poltsikoratu zuela, salgai-hondarra balitz, 92.000 eurotan, sendiak berarekin zuen 30.000 euroko zorra baliatuta. Erabateko maula izan zela eta kasuan mota guztietako irregulartasunak zeudela azaldu zuen, EAEko fiskal nagusia den Juan Kalparsorori horren berri eman ziotela gaineratuz.

Adi entzun ostean, Imanol Landa alkateak auzokideei hainbat erantzun eman zizkien, beti ez gustukoak. Argitu zien bera eta Elena Coria Gizarte Zerbitzuetako familiarekin gaur biltzekoak zirela, Udalak zertan lagun zezakeen zehatzago ikusteko. Era berean, goizean Sendia plataformak iragarritakoaren aurka, familia ostatzeko eskaintza atzorako soilik ez, gaurko, biharko, etziko eta "arazoari konponbide bat bilatzeko artekoa" izango zela, mugagabe printzipioz. Halere, atzotik ez, familiarekin denbora luzez lanean ibilia zela Udalak, baina tokiko erakundeak maileguaren auzian pertsonatzeko aukera ez zuela izan esan zien eta egungo egoeran ikusi beharko luketela horren aukera legokeen. Ertzaintzarekin kaleratze operatiboan "kolaboratzeagatik" Udaltzaingoa kritikatu zutenei esan zien udaltzainak trafikoari heldu ziotela, "segurtasunagatik". Ertzainen jokabidearen inguruan ez zuen hitz bat bera ere egin.

Saioa etenda, mozioa baztertuta eta astebeteko atzerapena

Halere, azalpen horiek ez ziren nahikoak izan jendea lasaitzeko eta hainbat alditan eskatu zuten hitza. Hori dela eta, 40 minutuz Udalbatza eten zuen alkateak, auzokideei gauzak pribatuan azaldu eta baretuta joan zitezen. Saioa abiatu eta hiru ordu beranduago heldu zen Aldapa 23ko etxe-gabetzearen auzia. Aurretik iragar zitekeenez, EAJk, PPk eta PSE-EEk baztertu zuten mozioa "presazkotzat" jotzea, eztabaida itxiz horrela. Aurretik Maitane Nerekan Umaran EH Bilduren zinegotzia prest agertu zen mozioaren edukia aldatzeko, alkateak agindutako kontuak barne bilduz eta beste alderdien ekarpenak sartuz, baina arratsaldeko Bozeramaileen Batzordean jasotako ezetza ikusita, "Aldapa 23ko auzian urgentzia dagoen ala ez eztabaidatzea hipokresia da, ezer adosteko borondaterik ez delako egon", iritzi zion Nerekanek.

Bestalde, EAJ, PP eta PSE-EE bat etorri ziren EH BIlduri bere helburu politikoak lortzeko "Aldapa 23ko familiaren minaz baliatzea" leporatzean. "Zelango aurpegia dekozuen!" bota zien barru-barrutik Arantza Gutierrez EH Bilduren zinegotziak. Gauzak horrela, "informazioa batu" eta datorren astean Udal Presidentziako Informazio Batzordean alderdi guztiek auzia aztertuko dute.

EH Bilduk aurkeztutako presazko mozioa

Getxoko Bilduk Aurkeztutako Urgentziazko Mozioa by Getxoko Ehbildu



Getxoko Udalbatza argazkitan

Jendartea Getxo
Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun