Metro Bilbaok konpromisoa hartu du garraio-sistema eraginkorra ematen jarraitzeko, jende asko mugituko dela aurreikusten den ekitaldietarako, batez ere. Horregatik, jaietako zerbitzua indartzen jarraituko du; bereziki abuztuan, Aste Nagusian.
BBK Live
Metro Bilbaok zerbitzu berezia martxan jarriko du BBK Live jaialdia dela-eta. Kontzertu kartel paregabea egongo da aurten ere Kobetamendin. Horretarako, uztailaren 10etik 11rako gauean, hau da, ostegunetik ostiralera, trenak 01:00etik 03:00etara bitartean ibiliko dira. Ostiral eta larunbatean, udan ohikoa denez, gau osoan ibiliko da.
Udaren etorrerarekin, Metro Bilbao garraio enpresak bere ordutegiak aldatu ditu, eskaerari erantzun egokia eman ahal izateko. Astelehenean, uztailak 7, udako zerbitzua jarriko du martxan, irailaren 7ra arte. Gainera, linea osoko udalerrietako jaietan zerbitzu bereziak ematen jarraituko du. Uztailean 07:00etatik 16:00etara bitartean (gutxi gora behera) 6 minuturo ibiliko dira trenak Bidezabal eta Kabiezeseraino; eta 3 minuturik behin adar nagusian. Arratsaldean, alde bietako maiztasuna 10 minutukoa izango da. Ostiral eta larunbatetan gaueko zerbitzua mantenduko da: Etengabeko zerbitzua 3 egunez. "Bezeroek zerbitzu hori baloratzen eta erabiltzen dute; izan ere, pasa den ostiralean, San Pedro jaiekin bat etorriz, 23:00ak eta 07:00ak bitartean 22.000 lagunek erabili zuten metroa jai-eremuetara joan eta handik itzultzeko, eta beste 36.000 pertsonak larunbatean. Bereziki aipatu behar da 17.437 pertsonak erabili zutela Sopelako geltokia asteburuan zehar. Horietatik, %53k gaueko zerbitzua erabili zuten", adierazi dute Metro Bilbaotik. Argazkian, metroa jendez gainezka artxiboko irudian.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun