Bigarren saria lortu duen Liya Grigoryan Trio 2012an sortu zen, Liya Grigoryan piano-jotzaile armeniarraren ekimenez. Azken horrek jazz ikasketak bost urte zituela hasi zituen eta hainbat musika-lehiaketetan parte hartu zuen. 2010ean jazz trebakuntza jarraitu zuen Amsterdamgo kontserbatorioan eta Europan kontzertuak eskaintzen jarraitu zuen. Italiako eta Alemaniako musikariekin Hirukotea osatuta, zenbait jazz ekitalditan parte hartu zuen eta lehen saria irabazi zuen Padovako (Italia) Banden Lehiaketan. Azkenik, Publikoaren Sariaren irabazlea, Austria eta Hungariako Lukas Gabric Group laukotea da, New Yorkeko lokal garrantzitsuetan aritu dena. Hain zuzen ere, kideek bertan ezagutu zuten elkar 2013an. Ikuspegi artistikoaren oinarriak dira tradizioa sakon ezagutzea, eta berrikuntzarako eta interakziorako borondatea izatea.
Sariak
Talde Lehiaketaren irabazleek 3.000 euro jasoko dituzte eta CD bat grabatuko dute, gaurko kontzertua emateaz gain. Halaber, garaileek Hoeilaart-eko (Belgika), Ibizako, Palmako eta Elorrioko jazzaldietan parte hartuko dute, Getxoko Jazzaldiak horiekin duen lankidetza.-hitzarmena dela medio.
2014ko talde lehiaketaren emaitza
Epaimahaiaren Saria
1. Saria: YLATIV ALGO QUINTET (Errusia-Alemania)
2. Saria: LIYA GRIGORYAN TRIO (Armenia-Italia-Espainia)
Bakarlaririk onena: LUKAS GABRIC (Lukas Gabric Groupeko saxo-jotzailea)
Publikoaren saria
Irabazlea: LUKAS GABRIC GROUP (Austria-Hungaria)
Bakarlaririk onena: LUKAS GABRIC (Lukas Gabric Groupeko saxo-jotzailea)
Errusia eta Alemaniako Ylativ Algo Quintet bandak irabazi du Getxoko 38. Nazioarteko Jazzaldiaren Talde Lehiaketa. Bigarren saria Liya Grigoryan Triorentzat izan da eta Lukas Gabricek, saxo-jotzaileak eskuratu du bakarlari onenari ematen zaion saria. Artista horren taldea, Lukas Gabric Group, nagusitu da Publikoaren Sarian eta talde onenari zein bakarlari onenari emandako bi sariak irabazi ditu. Talde irabazleak, Errusiako eta Alemaniako bost musikari batu ditu, eta haien musika interpretatzea dute xede. Vitaly Kiselev eta Olga Reznichenko taldeko bi konpositoreak Leipzigeko (Alemania) musika kontserbatorioan bekak dituzten bi ikasle dira. Bertan taldeko beste hiru kideak ezagutu zituzten (Niklas Kraft, Lukas Growe eta Philip Theurer), zentro bereko ikasleak eta askotariko musika-proiektuen kideak. Energiaz betetako boskotea osatzen dute, baina aldi berean, musika sentikorra interpretatzeko gai dira. Haiek egiten duten soinuan artista askoren lanak eragina du, hala nola Mark Turner, Dave Liebman eta Billy Hart. Argazkian, Ylativ Algo Quintet gaur arituko da berriz Algortako Biotz Alai plazan, 21:00etan, Diego "el Cigala" flamenko kantariak Jazzaldiari amaiera eman aurretik / © Getxoko Kultur Etxea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun