Bizkaiko Foru Aldundiak antolatutako Ertibil Bizkaia arte plastikoen erakusketa ibiltaria Leioan ikusgai izango da bihartik abuztuaren 3raino, udal iturriek zabaldu dutenez. Edizio honetara 141 obra aurkeztu dira, 35 urtetik beherako 104 artistak eginak. Espezialitate guztietan aurkeztu diren obren artean, 17 lan hautatu dira, Ertibil Bizkaia 2014 erakusketa eratzeko. Hona hemen 32. edizioan saria jaso duten artistak: María Azcona (Iruñea) “8848 metros” bere pintura obrarekin (akrilikoa mihise gainean), Kristina Losa (Gasteiz) “Concrete” obrarekin (ohial gainean akriliko eta transfer erabiliz), eta Oihana Torre (Bilbo) “49 kubo” obrarekin, 3 argazkiz osatutakoa. Ertibil Bizkaia Kultur Leioako erakusketa gelan ikusgai izango da astelehenetik ostiralera, 10:00etatik 14:00etara eta 17:00etatik 20:00etara; eta larunbat, igande eta jaiegunetan 12:00etatik 14:00etara. Argazkian, Josune Aristondo Bizkaiko Foru Aldundiko Kultura diputatua irabazleekin / cc-by pintbbaa.
Ertibil Bizkaia Bilbon abiatu zen, eta Gernika-Lumo, Lekeitio, Basauri, Barakaldo, Elorrio eta Gasteiztik igaro ondoren, Sestaon bukatuko da, 2015eko urtarrilaren 17an. 1983an lehen edizioa egin zenetik, Ertibil erakusketaren helburu nagusia beti izan da Bizkaian sormen-lana egiten duten eta agertzen ari diren artista berriak bultzatzea eta sustatzea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun