Asteazken honetan, uztailak 9, Bertso Jaialdi Mundialaren XVI. edizioa hartuko du Algortako Biotz Alai plazako karpak. Algortako Bertsolari Eskolak (ALBE) antolatuta, saio klasiko horrek esperimentazioa du ardatz nagusia, urtero sorpresaz beteta izaten dela. Emanaldia 21:00etan hasiko da eta bertan puntako sei bertsolari ariko dira. Andoni Egaña, Amets Arzallus, Maialen Lujanbio, Jon Maia, Fredi Paya eta Jone Uria bertsolariak Aitzol de Castro gai jartzailearen agindu berezietara egongo dira. Baina aurretik, gaur bertan, “Gaurik Laburrena” film laburren emanaldien aurtengo bigarren eta azken saioaz (euskaraz, 18 urtetik gorakoentzat) gozatzeko aukera izango dute Biotz Alain batzen direnek. Hitzordua 21:00etan jarri du, sarrera doan, Getxoko Kultur Etxeak. Horrenbestez, ondoko autoreen filmak egongo dira ikusgai: Izebene Oñederra, Ander Iriarte, Unai Unda, Alberto Gastesi, La Pecera, Andoni Mendizabal, Pello Varela eta Erabaki Produkzioak. Argazkian, Jone Uria Albizuri bertsolari algortarra, artxiboko irudian.
Biharko ekitaldiarekin jarraituz, planteamendu desberdin eta ausartaz baliatuta, ALBEko gai-jartzaile taldeak mimoz prestatzen ditu Bertso Jaialdi Mundialaren gaiak eta saioan zehar egoten diren une bereziak. Horrela, berrikuntza lortzea du xede nagusia. Gainera, publikoaren partaidetza behar duten sorpresa eta jarduera ugari izango dira ikuskizun dibertigarria eta originala bihurtuz. Ohi bezala, sarrera doakoa izango da.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun