Honako lanak burutuko dira:
1. Pultsadorea duen semaforo bat jarri Karmen baselizaren aurrean dagoen zebrabidean (Loiola Ander Deuna, 45). Aipatu zebrabidean istripu ugari gertatu dira, eta Udalak eta auzokideek etengabe eskatu dute bertan segurtasun-neurriak hartzea.
2. Loiola Ander Deuna kalearen 64. zenbakiaren aurrean zebrabide berri bat eta pultsadorea duen semaforo bat jartzea. Gaur egun, auzokideek errepidea gurutzatzen dute inolako zebrabiderik ez dagoen arren, horrek sortzen duen arriskuarekin (gidarientzat eta oinezkoentzat).
Sopelako Udalak pultsadorea duten semaforo bi jarriko ditu BI-634 foru-errepidean, Larrabasterran, Bizkaiko Foru Aldundiaren baimenak eskuratu ostean; errepide horren titulartasuna Aldundiarena baita. "Azken urte bietan, bai Udalak, bai Larrabasterrako auzokideek, Diputazioari etengabe eskatu diote aipatu errepidean abiadura murrizteko neurriak har zitzala, errepidea arriskutsua delako eta hainbat istripu jazo direlako (besteak beste, 2012an auzokide batek bizia galdu zuen Karmen baselizaren aurrean)", azaldu dute agintari sopleotarrek. Urte bi eskaerak egiten egon ondoren, Sopelako Udalak Bizkaiko Foru Aldundiaren baimena lortu du, baina lanen kostuei Udalak egin beharko die aurre (27.000 euro inguru), errepidearen titulartasuna Diputazioarena den arren, ohartarazi dutenez. Argazkian, hainbat auzokide Larrabasterrako BI-634 foru-errepidearen arriskuez ohartarazten / © Sopelako Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun