Jaiegun honek badu bitxikeria bat: haitzek eta baselizak Santa Marina izena badute ere, gurtzen den santua Santa Liberada da. Bere irudia urte osoan dago Urdulizko Andra Mari elizako sakristian gordeta, eta hilaren 20an beren-beregi ateratzen da bertatik, baselizara igotzeko eta meza nagusiaren buru izateko. Diotenez, Santa Liberada, Santa Marina eta beste zazpi ahizpa santu batera jaio ziren, erditze berean, Baionan, II. mendean. Agian horrexegatik, Santa Liberada haurdunen eta erditze onen zaindaritzat hartzen da. Hori dela eta, haurdun dauden emakumeek berari egiten diote otoitz.
Urduliztarren egitaraua:
Uztailak 19, larunbata
09:00 IX. Ehiza laneko txakur lehiaketa, Mentxakabaso zelaian.
12:30-13:00 Tortillen lehiaketarako izen-ematea.
14:00 Tortillen aurkezpena.
16:00 Koadrilen jokoak. Sari berezia koadrila txapeldunarentzat.
17:00 Tortilla lehiaketaren sari banaketa.
Tortilla lehiaketarako oinarriak:
- Sua egiteko egurra eskuragarri egongo da, baina butanoa ere erabili daiteke.
- Hurrengo osagarriak bakarrik erabili daitezke: patatak, arrautzak, olioa eta gatza.
- Bi maila desberdin: 16 urtera arte eta 16 urtetik aurrera.
- Kategoria berezia: tortilla handiena.
Uztailak 20, igandea
11:30 Eliz aurretik Santa Mariñe baselizaraino igoera udal agintariekin batera, txistulariak jai lagun izanda.
12:00 Meza nagusia eta ohorezko aurreskua.
13:00 Hamaiketakoa fanfarrearekin alaituta.
18:00 Santa Mariñetik Antsonekoa plazaraino jaitsiera, buruhandi eta honako dantza taldeekin: Ikusgarri (Portugalete), Agurra (Algorta), Iratxo Gorria (Urduliz).
20:00 Txokolatada eta erromeria herriko trikiti eta pandero taldeekin.
Sopeloztarren plana:
Uztailak 20, igandea
10:00 Txupina. Udaletxeko plazatik Santa Mariñera kalejira Barinatxe taldeko txistulariekin.
11:00 Meza nagusia Santa Mariñe baselizan.
11:30 Ohorezko aurreskua eta lore eskaintza
Fernando Ansoleagaren omenez.
12:00 Hamaiketakoa trikitixarekin alaitua.
14:00 Herri bazkaria Fernando Ansoleaga parkean.
17:00 Tortilla Lehiaketa.
18:00 Dantzaldia Orots taldearekin.
Urtero legez, Santa Marina edo Santa Mariñe eguna ospatuko dute uztailaren 20an sopeloztarrek zein urduliztarrek baselizaren inguruan. Horrenbestez, igandean (larunbatean egingo dituzte ehiza laneko txakur eta tortilla lehiaketak), baselizako inguruak zein Urdulizko kaleak ohiko jai-giroan murgilduko dira, izan ere, ospakizun hau urduliztarrek gehien maite duten jaietako bat da. Ume zein helduak haitzetaraino igotzen dira, Santa Liberada gurtzera. Modu horretan, jaiak eztanda egiten du, eta jende ugari biltzen da herrian. Izan ere, aspaldi-aspalditik, debozioa eta jai-tradizioa eskutik helduta doaz Santa Marina egunean; hain aspaldiko jaia da, inork ez baitaki ze urtetan hasi zen ospatzen. Halere, ondoko herrian, Sopelan, finago ibiliko dira edo, gutxienez, lehenago esnatu. Izan ere, bertan goizeko 10etan botako dute txupina udaletxetik eta Barinatxe taldeko txistulariekin batera, kalejiran irtengo dira baselizara arte. Mezaren ostean, 11:30ak aldera, ohorezko aurreskua eta lore eskaintza ere egingo dute Fernando Ansoleagaren omenez. Ordu horretan batuko dira Andra Mari elizan urduliztarrak haiek ere baselizara kalejiran abiatzeko. Eguerdian batuko dira bi herriak Santa Mariñeren inguruetan nork bere egitaraua izango duela. Argazkian, Sopelako Udalak antolatutako ohorezko aurreskua Santa Mariñe egunean / © Sopelako Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun