Araba, Bizkaia eta Gipuzkoako datuei dagokienez, guztira 7 eta 13 urte bitarteko 4.478 eskola-umek parte hartu dute uztailaren 1a eta abuztuaren 14a bitartean, biak barne. Hizkuntza-ereduka, kanpaina honetarako 4.478 plaza eskaini dira guztira, eta horietatik 3.686 euskaraz dira eta 792 elebidunak.
Zenbatean?
"Udalekuak programaren helburu nagusia haur eta gazte euskaldunek mota horretako taldeko jolas-jardueretan parte hartzea dela kontuan hartuta, Aldundiek beren gain hartzen dute plaza bakoitzaren kostu errealaren parte bat", azaldu dute Aldunditik. Hori dela eta, ondorengoak dira aurten ezarritako kuotak: zazpi eguneko txandetarako: 118 euro eta hamar eguneko txandetarako: 172 euro.
Prezio horien barnean mantenu osoko egonaldi batean berezkoak diren zerbitzuak sartzen dira, hau da, ostatua, gosaria, bazkaria, askaria eta afaria, dinamizazio zerbitzu bat, Istripuetarako eta erantzukizun zibileko asegurua, eta joan-etorriko garraioa jatorriko lekutik.
Familia ugarientzako hobariak eta gizarte larrialdietarako laguntzak
Gizarte larrialdietarako laguntzak jasotzen dituzten familietako haur eta gazteek eta familia ugarietakoak direnek hobaria dute kuotan (Bizkaian, DBE jasotzen dutenek %85 eta familia ugariek %30).
Hezkuntza-premia berezia duten pertsonek ere (desgaitasun fisiko, psikiko, sentsorial edo soziala) denbora libreko jardueretan parte hartzeko, Foru Aldundiek plazen %5 gorde dute kolektibo horrentzat.
Integrazio-prozesuaren behar bezalako garapena bermatzeko, Aldundiek kolektibo horiei aisian eta denbora librean arreta eskaintzen dieten elkarte espezifikoen kolaborazioa dute.
Bizkaiko Foru Aldundiak Gorlizen eskaintzen dituen udalekuak bisitatu ditu gaur Miren Josune Ariztondo Kultura diputatuak. Lurraldeko hainbat eskola-umeez gain, "Be part" izeneko truke programa europarrean izena emandako 15 eta 16 urteko 12 gaztek Aldundiak antolatutako udalekuen programaren esperientzia partekatuko dute Gorlizeko azpiegitura horretan. Gorlizeko udalekuetan 50 eskola-umek parte hartu dute uztailaren 16tik 22rako txandan. Bertara egindako bisitan, Bizkaiko Foru Aldundiak 2014ko kanpaina honetako izen-ematearen eta parte-hartzearen datuak jakinarazi ditu. Bizkaiari dagokionez, foru erakundeak 1.660 plaza eskaini ditu guztira eta zozketa bidez esleitu dira. Izan ere, 5.149 izen-emate jaso dira. Ariztondok ekimenaren garrantzia azpimarratu du: bere hitzetan, "elkarbizitzaren, kulturaren, solidaritatearen eta norberaren autonomiaren balioak zabaltzea du helburu ekimenak, besteak beste". Argazkian, Ariztondo gaurko bisitan / © Bizkaiko Foru Aldundia.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun