Beñat Algortako 7 urteko ume bat da, bihotzeko gaitz bat pairatzen duena. Hori dela eta, Bostongo Children ospitalean ebakuntza egin behar diote. 140.000 euroko kostua du ebakuntza horrek.
Zapiak ondoko establezimendutan salgai egongo dira: Algortako Jai Batzordeko txosnan; Villamonte, Salsidu, Bodeguilla, Abian, Txeli, Jolas Aurre, La Plaza, Salem, Sustrai, Algortako Batzokia, Boga, Getxo Rugby, Basagoiti 57, Satistegi, Ekia eta Baserri tabernetan; Berezi, Ondarreta, Julia Learra eta Kantxa Kirol Moda dendetan; eta Beñat Bihotzez elkartean.
Ez dira gutxi, orain arte, norbanako, eragile zein merkataritza establezimenduek Beñat Mardaras larri gaixo dagoen Algortako umearen alde antolatutako ongintzazko ekimenak: bat bera ere ahaztu nahi izan gabe, zozketak egin, itsulapikoak jarri eta ekitaldi solidarioen (sardina-janak, dantza ikuskizunak...) prestaketa aipa daitezke. Beñatek behar duen elkartasun eta laguntzaren jakitun, Algortako Jai Batzordeak ere prest ditu hainbat jarduera , bihar hasiko diren San Inazio jaiei (pdf) begira. Batetik, joan den astelehenetik ona denda eta tabernetan eskuragarri dauden jai-liburuxken kontrazalean, Beñaten egoera zein den eta zelan lagun dakiokeen azaltzeko tartea utzi du Jai Batzordeak. Bestalde, bereziak dira 2014ko zapiak. "Algortako jaiak" leloarekin batera, Algortako ume gaixoaren aldeko logotipo bilakatu diren bihotza eta harridura ikurra ikus daitezke zapi gorrian. 3 eurotan egongo da salgai eta irabazien erdia Beñat Bihotzez elkartearentzat izango da. Argazkian, aurten Beñaten aldeko zapia atera du Algortako Jai Batzordeak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun