Segurtasun Sailaren arabera, garrantzi berezia izango dute jaietan zirkulazioaren eta gai estupefazienteen kontsumoaren arloko prebentzioak eta zehapenak. Bestalde, Udaltzaingoak eta Ertzaintzak jai-ekitaldietan parte hartzen dutenei diru-zorroak eta ondasunak ongi zaintzeko eskatu diete, azaldu dutenez, lapurretan aritzen diren gaizkileak, zorro-lapurrak alegia, ugarituko baitira jaietara eta aurreikusitako kontzertuetara hurbilduko den jende andanak erakarrita.
Halaber, "alkatetzaren dekretuz xedatutako ordutegiak betetzeko orduan ere zorrotz jokatuko da, jaien gozamena eta gainerako pertsonen atsedenerako eskubidea bateragarri egiteko", Segurtasun Sailak berak nabarmendu duenez.
Erandioko Udaltzaingoak eta Ertzaintzak baterako antolamendu bat egingo dute Astrabuduako jaiak direla-eta (abuztuaren 6tik 10era), "gorabeherak prebenitzeko eta herritar guztien gozamena bermatu ahal izateko". Eusko Jaurlaritzaren Segurtasun Sailak adierazi duenez, antolamendu horren barruan alkoholemiako prebentzio-kontrolak egingo dituzte alkoholaren eraginpean dauden pertsonak bidean zirkulatzea saihesteko. Halaber, Poliziak agente gehiago izango ditu jaietan: "horri esker, polizia-patruilak izango dira, uniformez eta kaleko arropaz jantzita, bai jai-esparruan bai horren inguruan, baita Erandioko metro-geltokian ere, liskarrak eta erasoak saihestearren". Bereziki zainduko omen dituzte alkohola saltzen duten lokalak, haietan adingabeei edari alkoholdunik sal ez diezaieten. Argazkian, bihar hasiko dira Astrabuduako jaiak / © Erandioko Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun