Beldur Barik Jarrera lehiaketaren bosgarren edizioan emakumeek jasaten duten bereizkeria-egoerari aurre egiten dioten neska-mutilen arte-adierazpen mota oro onartu, baloratu eta bultzatuko da. Lan horiek errespetuan, berdintasunean, askatasunean eta autonomian, erantzukizun-kidetzan eta indarkeria sexistaren gaitzespen irmoan oinarritutako jokabide eta jarrerak izan behar dituzte.
Edozein adierazpen artistiko aurkeztu ahal izango da, ikus entzunezko formatuan, hau da, flashmob, poema errezitatuak edo hausnarketa testuak kameraren aurrean irakurrita, bideoklipak, argazkiak edo argazki-muntaiak, fotonobelak, lipdub, dantza, film laburrak, animazio proiektuak, proiektuen edo arte lanen aurkezpena, performance, hiri interbentzioak, eta abar.
Oinarriak
Emakundek antolatuta eta Foru Aldundiak eta Eudelek bultzatuta, berdintasunaren aldeko euskal udalen (tartean Getxokoa) Berdinsarea sarearen barruan, ikus-entzunezko lehiaketak bi kategoria ditu: 12 eta 17 urte bitartekoak batetik, eta 18 eta 26 bitartekoak, bestetik.
Bakarka edo taldean (ikastetxe bat, gela bat, elkarte bat) parte hartu daiteke lehiaketan. Kategoria bakoitzean 500 euroko lehen sari bana, eta 300 euroko bi bigarren sari banatuko. Horren gain, herriaren saria eta ikus-entzunezko ekoizpen onenari 300 euroko sari bana ere emango da.
Izen-ematea
Tailerretarako izen-ematea posta elektronikoz (berdintasuna[abildua]getxo.net), telefonoz (944 660 136) edo udal webgunearen bitartez www.getxo.net/berdintasuna. Beldur Barik Jarrera lehiaketarako proposamenak e-mail bidez jarrera[abildua]beldurbarik.org helbidera bidali beharko dira datorren azaroaren 12rako. Sariak azaroaren 29an banatuko dira, aurten Urola-Garaian egingo den Topaketan.
Gazteentzako bideo sormenari buruzko tailerrerako izena emateko epea luzatu dute Getxon
Getxoko Udalaren Berdintasun arloak gazteentzat antolatutako bideo sormenari buruzko tailerrerako izena emateko epea datorren irailaren 19ra arte luzatu du. Algortako Gaztelekuan emango den doako tailerra hilaren 22an hasiko da eta astelehenetan izango da urriaren 25era arte. 17 eta 21 urte bitarteko gazteei zuzenduta, sormena landuko da eskura dauden baliabideak erabiliz (eskuko telefonoak, kamerak ...). Bideoaren bitartez berdintasuna sustatu eta indarkeria matxistari ezetz esaten landuko dute. Lanak Beldur Barik Jarrera lehiaketara aurkeztu ahal izango dituzte parte hartzaileek, gazteen artean berdintasuna, errespetua, autonomia eta askatasuna sustatzea helburua duena. Tokiko iturriek gogoratu dutenez, musikaren eta antzerkiaren bitartez, maitasun harremanak landuko dituen antzerki tailerrerako (balore berberekin) izena emateko epea ere zabalik dagoela. Hauxe 14 eta 17 urte bitarteko gazteei zuzenduta dago eta Utopian gunean izango da asteazkenetan, urriaren 15etik azaroaren 12ra. Argazkian, hainbat neska-mutil Algortako Urgull kaleko Gauegun gaztelekuan / © Getxoko Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun