Prozesua maiatzaren 22an hasi zen, udaletxean ospatutako tailer ireki baten bidez. Horren ostean bilera sektorialak egin dira herriko hainbat eragile edo talde soziologikorekin: eskoletako ikasleak (Zipiriñe, Iberre eta Ander Deuna), dendari txikiak, herriko elkarteak, emakumeak eta nagusiak. Tailer bakoitzean herritarrek herriko mugikortasuna aztertu dute eta hausnarketa kolektibo bat egin dute, ekarpenen bidez.
Auzokideen iritzia jaso ostean, Udalak kontratatutako HiriDunak taldeko teknikariek herriko erdigunean mugikortasuna eta irisgarritasuna hobetzeko hainbat proposamen egin dituzte. Proposamen horiek udal igerilekuen sarreran egongo dira ikusgai, irailaren 19tik urriaren 3ra arte. Erakusketa horietan teknikariak izango dira, herritarren zalantzak argitzeko eta proposamenak azaltzeko.
Herritarrek, beraz, berriro ere euren iritzia emateko aukera izango dute, eta behin ekarpen guztiak jaso ostean, behin-betiko proiektua sortuko da. Sopelako Udalak auzokideak animatu gura ditu erakusketan parte hartzera.
Orain arte burututako prozesuaren bideoa
Mugikortasuna hobetzeko proposamenen inguruan iritzia emateko aukera badago Sopelan
Irailaren 19tik (ostirala) urriaren 3ra arte Sopelako udal igerilekuen sarreran erakusketa parte-hartzaile bat egongo da ikusgai, herritarrek Sopelako erdigunean mugikortasuna hobetzeko proposamen ezberdinen inguruan euren iritzia eman dezaten. Ekimena maiatzean hasitako “Sopela, pertsonen gunea” prozesu parte-hartzailearen baitan kokatzen da, udal iturriek zehaztu dutenez. Horren helburua herriko erdigunean mugikortasuna hobetzea da, herritarrek ekarpenetatik abiatuz. "Esan bezala, proiektuaren helburua Sopelako herritarren bizitza-kalitatea hobetzea da, erdigunean mugikortasuna hobetuz. Proiektuaren oinarria mugikortasun jasangarria izan da, pertsonei egokitutako hirigintza kontuan hartuz. Hau da, hiri-mugikortasunean ohiko lehentasunak irauli dira, pertsonei lehentasun osoa emanez: pertsonen egunerokotasuna, zaintza lanak, oinez eta bizikletaz burutzen diren desplazamenduak, eta abar", azaldun dute. Argazkian, herri bilkura bat udaletxeko sarreran / © Sopelako Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun